Background
ရေနံချောင်း၊ ပခုက္ကူဘက်မှ ကြက်သွန်နီများဟာ အစို့ပေါက်ပစ္စည်းအဟောင်းများဖြစ်ပြီး၊ ယခုတစ်ပတ် အတွင်း တစ်နေ့ကို ၃၅ ပိဿာဝင် အိတ် ၃၀၀ ခန့်အဝင်ရှိပါတယ်။ အရောင်းအဝယ်မှာ လက်လီ၊ လက်ကားရောင်းဝယ်သူများ၊ ဧရာဝတီတိုင်း ဒေသကြီးနဲ့ ရခိုင်ပြည်နယ်တို့ကို တင်ပို့မှုအဖြစ် ဝင်ရောက်မှုရဲ့ ထက်ဝက်ခန့် တစ်နေ့ အိတ် ၁၅၀ ခန့် အရောင်းအဝယ်ဖြစ်နေကြောင်း သိရပါတယ်။ ဝင်ရောက်မှုမှာ ကြက်သွန်နီ(အသေး)စများ အဝင်များပြီး၊ ပွဲရုံများမှာ ယခင်တစ်ပတ် အသေး တစ်ပိဿာ ၅၀၀ကျပ်မှ ယခု ၄၀၀ကျပ်ဖြစ်ပြီး၊ ကျန်အမျိုးအစားများမှာ ယခင်အပတ်ဈေးအတိုင်း တစ်ပိဿာကို (ရှယ်) ၇၀၀ ကျပ်၊ (ကြီး) ၆၅၀ ကျပ်၊ (လတ်) ၅၅၀ ကျပ်တို့နဲ့ ရောင်းဝယ်လျက်ရှိနေတာတွေ့ရပါတယ်။ ဝင်းလဲ့ဝါ
ပင်လယ်ရေကြောင်းကုန်သွယ်မှုလမ်းမှ နိုဝင်ဘာ ၂၀ ရက်မှ ၂၆ ရက်နေ့တာ ကာလအတွင်း နနွင်း ၁၉ ဒသမ ၇၅တန်ကို တင်ပို့ခဲ့ပါတယ်။ မလေးရှားနိုင်ငံကို ၁၄ ဒသမ ၇၅ တန်နဲ့ စင်ကာပူကို ၅ တန်ဖြစ်ပါတယ်။ နိုဝင်ဘာလ ပထမပတ်အတွင်း တစ်ကြိမ်သာတင်ပို့ခဲ့တဲ့ နနွင်းက နှစ်ပတ်ဆက်တိုက်အပို့ပျောက်ခဲ့ပါတယ်။ တစ်တန်ကို အက်ဖ်အိုဘီဈေး ပျမ်းမျှကန်ဒေါ်လာ ၁၅၀၀ ဝန်းကျင်နဲ့ တင်ပို့ခဲ့လို့ စုစုပေါင်းပို့ကုန်ဝင်ငွေ ကန်ဒေါ်လာနှစ်သောင်းကိုးထောင်ကျော်ရရှိခဲ့ပါတယ်။MIRT(DOT)
ရှမ်းပြည်နယ်တောင်ပိုင်းရဲ့ ချင်းအဓိကစိုက်တဲ့ ကလော၊ ရပ်စောက်၊ ပင်လောင်း၊ ပင်းတယစတဲ့မြို့နယ်တွေက ချင်းတွေလည်း ဈေးကွက်ကိုဝင်လာပြီဖြစ်တာကြောင့် အဝင်က အတော်များလာပြီး၊ ဈေးကွက်ကို မဝင်သေးတာကတော့ ဟိုပုံးချင်းနဲ့ နမ့်စန်ချင်းတွေသာဖြစ်ပါတယ်။ အဲဒီချင်းတွေကတော့ ဒီဇင်ဘာလလယ် လောက်မှသာ ဈေးကွက်ကိုစပြီး ဝင်နိုင်တယ်လို့ ဒေသခံတွေထံက သိရပါတယ်။ အောင်ပန်းဈေးကွက်မှာတော့ မြို့နယ်အစုံ က ချင်းသစ်တွေ ဝင်လာတာကြောင့်ဈေးနှုန်းတွေကိုလည်း အရည်အသွေးနဲ့ မြေအရောင်တွေပေါ်မူတည်ပြီး သတ်မှတ် ကြပါတယ်။ ကလောမြို့နယ်ကဝင်တဲ့ မြေနီ ချင်း(အခက်ကြီးအလှ)တစ်ပိဿာ ၄၅၀ ကျပ် ဈေးရှိပြီး၊ မြေဝါ ချင်းက ၄၂၀ ကျပ်၊ မြေဖြူချင်းက ၄၀၀ ကျပ်ဈေး ရှိပါတယ်။ ချင်းအဝင်ကလည်း ၅ ရက် တစ်ဈေးကို ပိဿာချိန် ၆ သောင်း ခန့် အဝင်ရှိနေပါတယ်။ ပြည်တွင်းသုံးအတွက် ဝယ်ယူနေတာကြောင့် အရောင်းက လည်းတစ်ပတ်ကို ပိဿာချိန် ၅ သောင်း - ၆ သောင်းခန့် ပြန်ထွက်ပါတယ်။ ရပ်စောက်မြို့နယ် ကောင်းဘို့ရွာကဝင်တဲ့ ချင်းကိုတော့ ဓားလှီးချင်းအဖြစ်နဲ့ ဝယ်ယူနေ တာကြောင့် တစ်ပိဿာ ၃၅၀ ကျပ် - ၃၇၀ ကျပ်ဈေးနဲ့ အရောင်းအဝယ် ဖြစ်နေတယ်လို့လည်း သိရပါတယ်။ ချင်းခြောက်ကတော့ တစ်ပိဿာ ၂၃၀၀ ကျပ်ဈေးရှိပြီး၊ လက်ကျန်အတော်များများရှိနေသေးတာကြောင့် အသစ်ပြုလုပ်ဖို့ မရှိသေးဘူးလို့လည်း ချင်းပွဲရုံတွေက သိရပါတယ်။ ဧဧခိုင်
ပြည်ဈေးကွက်ကိုဝင်တဲ့ အောင်ပန်း၊ တောင်ကြီးဘက်မှ ချင်းများမှာ ပစ္စည်း အရည်အသွေး ကောင်းနေတဲ့ အတွက် ပွဲရုံများမှာ လက်လီ - လက်ကားရောင်း ဝယ်သူများ၊ ဧရာဝတီတိုင်းဒေသကြီးနဲ့ ရခိုင်ပြည်နယ်တို့ကို တင်ပို့မှုအပါ အဝင်တစ်နေ့ကို ပျမ်းမျှပိဿာချိန် ၆၅၀ ခန့်နဲ့ အရောင်းအဝယ်သွက်နေကြောင်း သိရပါတယ်။ ဝင်ရောက်မှုအား ဖြင့်လည်း ယခုတစ်ပတ်မှာ ပိဿာချိန် ၃၀ ဝင် အိတ် ၈၀၀ခန့်နဲ့ ယခင်အပတ်ထက် အဝင်များလျက်ရှိနေပါတယ်။ ချင်းများလှိုင်လှိုင် ထွက်ပေါ်နေတဲ့အတွက် ဈေးနှုန်းအနေနဲ့လည်း ယခင်အပတ်ဈေးအတိုင်း ချင်း(ရှယ်) တစ်ပိဿာ ၈၅၀ ကျပ်၊ (ဂျွန်) ၆၅၀ ကျပ် - ၇၀၀ ကျပ်တို့နဲ့ ရောင်းဝယ်လျက် စားသုံးသူရော၊ ရောင်းဝယ်သူများပါ အဆင်ပြေ နေတဲ့ ဈေးနှုန်းဖြစ်လို့ ယခင်နှစ် ကာလတူ ချင်းဈေး တစ်ပိဿာ(ရှယ်) ၁၅၀၀ ကျပ်၊ (ဂျွန်) ၁၂၀၀ ကျပ်တို့နဲ့ နှိုင်းယှဉ်ပါက ပစ္စည်းအရည်အသွေးကောင်းပြီး ဈေးချိုလျက်ရှိကြောင်း သိရပါတယ်။ ပွဲရုံများမှ ချင်းဓါးလှီးအလုပ်သမားများခေါ်ယူ၍ ကိုယ်တိုင်ရောင်းချလျက်ရှိပြီး တစ် ပိဿာကို ၁၀၀၀ ကျပ်ဈေးရှိကြောင်း သိရပါတယ်။ ဝင်းလဲ့ဝါ
မန်းပဲဈေးကွက်သို့ ကုလားပဲဖြူလုံးကြီးနဲ့ ကုလားပဲတိုင်ပေတို့ ပစ္စည်း အဝင်နည်းကာ လက်ကျန်လည်း နည်းလာပြီလို့သိရပါတယ်။ နိုဝင်ဘာလ ပထမ ပတ်နဲ့ ဒုတိယပတ်တို့မှာ တောင်သူတွေ မျိုးပြန်လည်ဝယ်ယူခဲ့ခြင်း၊ ခွဲစက်များနဲ့ ရန်ကုန်ဝယ်လို အားကောင်းလာခြင်းတို့ကြောင့် ဈေးကွက်အတွင်း ကုလားပဲဖြူလုံး ကြီးတစ်ပိဿာ ၁၁၅၃ ကျပ်၊ ထိုင်ဝမ် ၁၀၄၀ ကျပ်နဲ့ ဈေးမြင့်ကာ အရောင်းအဝယ် လည်း သွက်တယ်လို့ ဈေးကွက်ကသိရပါတယ်။ တတိယပတ်နဲ့ စတုတ္ထပတ်တို့မှာတော့ ဈေးကွက်အတွင်း ရန်ကုန်ဝယ်လက် အားပျော့လာကာ၊ တောင်သူတွေစိုက်ပျိုးပြီးစီးခဲ့တာကြောင့် ခွဲစက်များကလည်း အောက်ဈေးနဲ့ဝယ်ယူနေပါတယ်။ တတိယပတ်မှာ ကုလားပဲဖြူတစ်ပိဿာ ၁၀၁၃ ကျပ်၊ တိုင်ပေ ၉၄၂ ကျပ်နဲ့ အမြင့်ဆုံးအရောင်းအဝယ်ဖြစ်ခဲ့ပြီး၊ နောက်ဆုံးပတ်မှာ ကုလားပဲဖြူလုံးကြီးတစ်ပိဿာ ၉၇၈ ကျပ်နဲ့ ထိုင်ဝမ် ၈၈၉ ကျပ်ထိ ဈေးအေး လာကာ အရောင်းအဝယ်လည်း အေးလာကြောင်း ဈေးကွက်မှသိရပါတယ်။ မန်း ဈေးကွက်မှာ ကုလားပဲလက်ကျန်နည်းလာတာကြောင့် လှောင်လက်အချို့ ထုတ်ရောင်းတာနည်းပါတယ်။ ရန်ကုန်လက် အဝယ်ပြန်လိုက်လာရင်တော့ ကုလားပဲဈေး ပြန်လည်ဦးမော့လာနိုင်တယ်လို့ ကုန်သည်များကဆိုပါတယ်။ နိုင်ထွန်း
ပင်လယ်ရေကြောင်းက ကုလားပဲတင်ပို့မှုမှာ လျော့ကျလက်ရှိရာ ယခုတစ်ပတ် (နိုဝင်ဘာလ ၂၁-၂၅ ရက်) အတွင်းမှာလည်း လက်ကျန်တန်ချိန် ၂၄၄ သာ တင်ပို့မှုရှိခဲ့ပါတယ်။ FOB ဈေးကွက်မှာ အရောင်းအဝယ်ဖြစ်မှုမှာလည်း နိုဝင်ဘာ ၃၀ ရက်မှာ ၇၂ တန်သာ စာချုပ်ခဲ့ကြောင်း သိရပါတယ်။ အိန္ဒိယပြည်တွင်းဈေးကွက်မှာ ဈေးလျော့ကျပြီး ဝယ်လိုအားနည်းခြင်းနဲ့အတူ ပြည်တွင်းဈေးကွက်မှာလည်း ပဲခွဲစက်များအဝယ်ရှိလို့ လက်ကျန်နည်းလာပြီလို့ သိရပါတယ်။ ရန်ကုန် FOB ဈေးကွက်မှာ ပြောင်းလဲမှုမရှိဘဲ ဒီဇင်ဘာလ ၂ ရက်မှာ FAQ တစ်တန် ကန်ဒေါ်လာ ၉၆၀-၉၈၀ ရှိကြောင်း သိရပါတယ်။ MIRT(MAPT)
ယခုတစ်ပတ် ပြည်ဈေးကွက်သို့ ပဲတီစိမ်းများ နယ်စုံမှဝင်ရောက်လျက်ရှိပြီး၊ တစ်ရက်အိတ် ၃၀၀ ခန့် အဝင်ရှိခဲ့ပါတယ်။ ပဲတီစိမ်းဈေးနှုန်းမှာ တစ်တင်းထိပ်စ ၁၇၃၀၀ ကျပ်၊ ရိုးရိုးစတစ်တင်း ၁၅၀၀၀ ကျပ်ဖြင့်သာ အရောင်းအဝယ်ဖြစ်ခဲ့ပါတယ်။ ရန်ကုန်ဝယ်လက်ရော မန္တလေးဝယ်လက်ပါ အဝယ်ရှိတဲ့အတွက် အဝင်ရှိ သလောက် အရောင်းအဝယ်ဖြစ်ခဲ့တယ်လို့ သိရပါတယ်။ ယခုတစ်ပတ်အတွင်း ရန်ကုန်သို့ အိတ် ၅၀၀ ကျော် တင်ပို့နိုင်ခဲ့ကြောင်းသိရပါတယ်။ ခင်ဆွေဝင်း
နိုဝင်ဘာလ ၂၈ ရက်မှာ မန္တလေးပဲဈေးကွက်မှာ ပဲတီစိမ်းထိပ်စကို ၃ တင်းတစ်အိတ် ၄၈၀၀၀ ကျပ်၊ တစ်ပိဿာ ၈၅၃ ကျပ်နဲ့ အရောင်းအဝယ်ဖြစ်ခဲ့ပါတယ်။ ပြည်၊ အောင်လံထွက် ပဲတီစိမ်းများ အရည်အသွေး ကောင်းတဲ့အတွက် နိုဝင်ဘာလ ၂၉ ရက်မှာ ပဲတီစိမ်းကြီးထိပ်စ ၃ တင်းတစ်အိတ် ၅၇၀၀၀ ကျပ်၊ တစ်ပိဿာ ၁၀၁၃ ကျပ် အမြင့်ဈေးနဲ့ အရောင်း အဝယ်ဖြစ်တာကို တွေ့ရပြီး၊ နိုဝင်ဘာလ ၃၀ ရက်မှာ ၃ တင်းတစ်အိတ် ၅၄၀၀၀ ကျပ်၊ တစ်ပိဿာ ၉၆၀ ကျပ်ဖြင့် အရောင်းအဝယ်ဖြစ်လို့ ဈေးအနည်းငယ် အေးသွားပါတယ်။ တရုတ်ဝယ်လက်မှ အမြင့်ဈေးရော၊ အနိမ့်ဈေးနဲ့ပါ ပုံမှန် အရောင်းအဝယ်ရှိတယ်လို့ ဈေးကွက်ကဆိုပါတယ်။ ပြီးခဲ့တဲ့ အောက်တိုဘာလက ၁၆ မိုင်စစ်ဆေးရေးဂိတ်မှ ပဲတီစိမ်း ၂၈၀၉ တန်ခန့် အထွက်ရှိလို့ တစ်ရက်ကို တန် ၉၀ ကျော် စီးထွက်သွားကြောင်း၊ ယခုနိုဝင်ဘာလ ၂၇ ရက်နေ့ထိ ၂၇၄၈ တန်ခန့် စီးထွက်သွားလို့ တစ်ရက်ကို တန် ၁၀၀ ကျော်အထွက်ရှိနေတာမို့ ယခုလ ပဲတီစိမ်းတင်ပို့မှု ပိုမိုကြောင်း၊ တစ်ရက်ကို ပျမ်းမျှ ၁၀ အိတ်ခန့် အထွက်ပိုကြောင်း သိရပါတယ်။ ဈေးအနိမ့်၊ အမြင့် မြန်ဆန်တာကြောင့် အရောင်းအဝယ်ကိုလည်း သွက်သွက် လက်လက် လုပ်ကိုင်ရ ကြောင်း၊ အချိန်နဲ့အမျှ ဈေးပြောင်းလဲမှုကြောင့် အမြတ်အစွန်းအနည်းငယ်ဖြင့်သာ ရောင်းဝယ်ရကြောင်း ပဲတီစိမ်း ဈေးကွက်က သိရပါတယ်။ စိုးအောင်
အိန္ဒိယဈေးကွက်များကို ရာဂျက်စသန်ဘက်မှ ပဲတီစိမ်းများ တစ်ရက်အိတ် ၄၄၀၀၀-၄၅၀၀၀ ခန့်အဝင်ရှိလို့ ပဲတီစိမ်း ဈေးကျဆင်းခဲ့ပါတယ်။ ဒါ့အပြင် ပဲခွဲစက်များမှ ဝယ်လိုအားမရှိဘူးလို့ သိရပါတယ်။ ဈေးကွက်တွေမှာ သိုလှောင်ပဲများနေခြင်းနဲ့ ဝယ်ယူမှုနည်းခြင်းတို့ကြောင့် လာမယ့် ရက်တွေမှာလည်း ဈေးကျဆင်းနိုင်တယ်လို့ ခန့်မှန်းကြပါတယ်။ လက်ရှိဈေးနှုန်းဟာ ယခင်နှစ်နဲ့ နှိုင်းယှဉ်ရင် ၄၀ ရာခိုင်နှုန်းခန့်ကျဆင်းလာတယ်လို့ သိရပါတယ်။ ဈေးကွက်များမှာ ဖြစ်ပေါ်တဲ့ ဈေးနှုန်းများ နှိုင်းယှဉ် ဖော်ပြလိုက်ပါတယ်- ဒေါ်လာ/ တန် ၃၀-၁၁-၁၁ ၂၉-၁၁-၁၁ ၂၈-၁၁-၁၁ ၂၆-၁၁-၁၁မွန်ဘိုင်း (တန်ဇန်းနီးယား) ၇၇၉-၇၈၄ ၇၈၃ ၇၈၃-၇၈၈ ၇၈၀-၇၈၅ဒေလီ ၄၂၃-၆၃၅ ၄၀၄-၆၁၅ ၄၂၃-၆၃၄ ၄၂၁-၆၃၅အာကိုလာ ၆၇၃-၈၂၇ ၆၇၃-၈၀၇ ၇၃၀-၈၄၆ ၇၈၅-၈၄၂MIRT(MAPT)
ရန်ကုန် FOB ဈေးကွက်မှာ ယခုတစ်ပတ် (နိုဝင်ဘာလ ၂၅ ရက်မှ ဒီဇင်ဘာလ ၁ ရက်)အတွင်း ပဲတီစိမ်း တန်ချိန်၁၂၀၀ ခန့်သာ စာချုပ်ချုပ်ဆို အရောင်းအဝယ်ဖြစ်ခဲ့လို့ ယခင်တစ်ပတ်ထက်လျော့နည်းရောင်းဝယ်ခဲ့ပါတယ်။ အိန္ဒိယ ဝယ်လက်အချို့မှ အရည်အသွေးကောင်းတဲ့ ပခုက္ကူ၊ အောင်လံဘက်က ပဲတီစိမ်းအသစ်များ ဝယ်ယူမှုရှိတယ်လို့ သိရပါတယ်။လတ်တလောမှာ အိန္ဒိယဈေးကွက်တွေမှာ အိန္ဒိယထွက် ပဲတီစိမ်းအသစ်တွေ ဝင်ရောက်နေဆဲဖြစ်လို့ ဝယ်လိုအားနည်းနေပေမဲ့ လာမယ့်ရက်တွေမှာတော့ အရည်အသွေးကောင်းတဲ့ ပဲတီစိမ်းများ အဝယ်လိုက်လာနိုင်တယ်လို့ ခန့်မှန်းကြပါတယ်။ရန်ကုန် FOB ဈေးမှာ ပြောင်းလဲခြင်းမရှိဘဲ ဒီဇင်ဘာလ ၂ ရက်နေ့မှာလည်း FAQ(အညာ) တစ်တန် ကန်ဒေါ်လာ ၇၀၀-၇၂၀၊ ပခုက္ကူ တစ်တန် ကန်ဒေါ်လာ ၇၂၀-၇၄၀ နဲ့ ရွှေဝါအကြီး တစ်တန် ကန်ဒေါ်လာ ၈၆၀-၈၈၀ အသီးသီးရှိကြောင်းသိရပါတယ်။MIRT(MAPT)