ငွေကြေးဖောင်းပွမှု မြင့်တက်နေတာကြောင့် ကုန်ပစ္စည်းများသိုလှောင် စုဆောင်းထားဖို့ ဗီယက်နမ်နိုင်ငံစီစဉ်                 ဗီယက်နမ်အစိုးရဟာ ပြည်တွင်းကုမ္ပဏီများမှ ဆန်နဲ့ အခြားကုန်ပစ္စည်း ၄ မျိုးကို သိုလှောင်ဖို့ လိုအပ်ချက် တွေစီစဉ်နေတယ်လို့ သိရပါတယ်။ ထုတ်လုပ်မှုနဲ့ ကုန်သွယ်ရေးဝန်ကြီးဌာနရဲ့ တင်ပြချက်အသစ်အရ ပြည်တွင်းရောင်းချမှု ဖူလုံဖို့နဲ့ဈေးနှုန်းတည်ငြိမ်စေဖို့အတွက် ဗီယက်နမ်ကုမ္ပဏီများဟာ ဆန်၊ သကြား၊ စတီး၊ ဓါတ်မြေသြဇာနဲ့ တိရစ္ဆာန်အစာများ သိုလှောင်သွားမှာ ဖြစ်ပါတယ်။ အရေးပါတဲ့ အဲဒီကုန်စည်များ ရောင်းဝယ်နေတဲ့ ကုမ္ပဏီများဟာ ၎င်းတို့ သိုလှောင်ထားရှိမှုရဲ့ ၃ ရာခိုင်နှုန်းနဲ့ ၁၂ ရာခိုင်နှုန်းအတွင်း ချန်လှပ်ထားရမယ်လို့ ဝန်ကြီးဌာနရဲ့ မူကြမ်းမှာပါရှိကြောင်း သိရပါတယ်။ အပြန်အလှန် အားဖြင့် ယင်းကုမ္ပဏီများဟာ အတိုးနှုန်းနည်းတဲ့ ချေးငွေရရှိခွင့် ရှိမယ်လို့ သိရပါတယ်။ သတ်မှတ်ထားတဲ့အချိန်မှာ ဈေးကွက်အခြေအနေပေါ်မူတည်ပြီး သိုလှောင်ဖို့ လိုအပ်တဲ့ ကုန်သည်အရေအတွက်ကို ယင်းဝန်ကြီးဌာနက ဆုံးဖြတ် သွားမယ်လို့ သိရပါတယ်။ ဒါ့အပြင် ဈေးကွက်ပေါက်ဈေး ထက် ၁ဝ ရာခိုင်နှုန်း ခန့် လျော့ကျတဲ့ ဝန်ကြီးဌာနက သတ်မှတ်တဲ့ဈေးနဲ့ ယင်းသိုလှောင်ပစ္စည်း တွေကို ရောင်းချသွားရမယ်လို့လည်း သိရပါတယ်။ ဧပြီလအတွင်း ငွေကြေးဖောင်းပွမှုဟာ ယခင်နှစ်ထက် ၁၇ ဒသမ ၅၁ ရာခိုင်နှုန်း မြင့်တက်ခဲ့ပြီး အထူးသဖြင့် စားနပ်ရိက္ခာနဲ့ အစားအသောက်ဈေးနှုန်း ဟာ ယခင်နှစ်ထက် ၂၄ ဒသမ ၄ ရာခိုင်နှုန်းမြင့်တက်ခဲ့တယ်လို့ သိရပါတယ်။ လဝန်း Source: Thanh Nien

မတ်ပဲလည်း နယ်စပ်က အနည်းအကျဉ်းပို့              ဧပြီလ ၂၇ ရက်မှ မေလ ၃ ရက်ထိကာလအတွင်း မူဆယ် ၁ဝ၅ မိုင် ကုန်သွယ်ရေးဇုန်မှ ဒေါ်လာ ဝ ဒသမ ဝ၁၆ သန်းတန်ဖိုးရှိ မတ်ပဲ ၁၈ တန်ကို ၂ဝ၁၁-၂ဝ၁၂ ဘဏ္ဍာနှစ်မှာ ပထမဆုံးအကြိမ်အနေနဲ့ စတင် တင်ပို့လိုက်ပြီဖြစ်ပါတယ်။ ၂ဝ၁ဝ-၂ဝ၁၁ ဘဏ္ဍာနှစ်မှာတော့ မတ်ပဲ ၈၆၂၂ တန် တင်ပို့ခဲ့ပါတယ်။ မိမိဖက်မှာ မတ်ပဲတစ်တန်ကို ၇၃၅၂၄ဝ ကျပ်ဈေးရပြီး တစ်ဖက်နိုင်ငံဈေးကတော့ ၉၉၉ ဒေါ်လာ ဖြစ်ကြောင်း သိရပါတယ်။ MIRT (DOBT)

နယ်စပ်အပို့လည်း တဖြည်းဖြည်းတက်လာ             ဧပြီလ ၂၇ ၇က်မှ မေလ ၃ ရက်ထိကာလအတွင်း မူဆယ်ကုန်သွယ်ရေး ဇုန်ကနေ ပဲယင်း ၄၅၅ တန်၊ တန်ဖိုးကန်ဒေါ်လာ ဝ ဒဿမ ၃၂၂ သန်းဖိုး တင်ပို့ခဲ့ပါတယ်။ ယခင်အပတ်က တန် ၃ဝဝ နီးပါးတင်ပို့ခဲ့တာကြောင့် ယခုအပတ် တင်ပို့မှု ပိုမိုတိုးတက်လာတာတွေ့ရှိရပါတယ်။ မိမိဘက်ပေါက်ဈေးက တစ်တန် ၄၂၅၅ဝဝ ကျပ်နဲ့ တစ်ဘက်နိုင်ငံဈေးနှုန်း ၅၅၈ ဒေါ်လာဖြစ်ကြောင်း သိရှိရပါတယ်။     MIRT (DOBT )

အဝယ်သွက်လာတာကြောင့် အိန္ဒိယ ကုလားပဲဈေးမြင့်တက်                  လွန်ခဲ့တဲ့ သီတင်းပတ်များအတွင်း ကုလားပဲလက်ငင်းနဲ့ ကြိုပွိုင့်ဈေးများကျဆင်း နေခဲ့ရာမှ အဝယ်ပြန်သွက်လာတဲ့အတွက် မေလ ၃ ရက်မှာ လက်ငင်းရော ကြိုပွိုင့် ပါ ဝ ဒသမ ၅၃ ရာခိုင်နှုန်းနဲ့ ၁ ဒသမ ၆၇ ရာခိုင်နှုန်း အသီးသီးမြင့်တက်ခဲ့တယ်လို့ သိရပါတယ်။ လွန်ခဲ့တဲ့ ၂ ရက်အတွင်း ပဲလုံးဈေးနှုန်းမြင့်တက်ခြင်းကလည်း ကုလားပဲဈေးကို အထောက်အပံ့ဖြစ်စေပါတယ်။                       မဒ္ဒရာပရာဒေ့ရှ်ပြီးရင် ကုလားပဲထုတ်လုပ်မှု ဒုတိယအများဆုံးပြည်နယ်ဖြစ်တဲ့ ရာဂျက်စသန်မှာ ပဲရိတ်သိမ်းမှုက အမြင့်ဆုံးကာလဖြစ်ပြီး မေလလယ်တိုင်အောင် ဆက်လက်ရိတ်သိမ်းမှုရှိတယ်လို့ သိရပါတယ်။ ပုံမှန်မိုးရွာသွန်းမယ့် အလား အလာ အရ စိုက်ဧက တိုးတက်နိုင်တဲ့ မျှော်လင့်ချက်တွေကြောင့် ကုလားပဲမှအပ ပဲစင်းငုံလို အခြားပဲရောင်းဝယ်မှု လျော့တယ်လို့ သိရပါတယ်။ လတ်တလောမှာ ဈေးကွက်အဝယ်တက်နိုင်တဲ့အတွက် ကုလားပဲ အရောင်း အဝယ် ခိုင်မာနိုင်ပြီး မေလအထိ ကာလတိုအတွင်း တစ်တန် ရူပီး ၂၂၇၅ဝ- ၂၄၅ဝဝ (ကန်ဒေါ်လာ ၅ဝ၉-၅၄၈) ဝန်းကျင်မှာ အရောင်းအဝယ် ဖြစ်နိုင်တယ်လို့ ကုန်သည်များက ခန့်မှန်းကြပါတယ်။ ဒါပေမဲ့ ကာလလတ်အတွင်းမှာ ပဲဝင်ရောက်မှု တဖြည်းဖြည်း ကျဆင်းနိုင်တဲ့အတွက် ကုလားပဲဈေးပြန်လည်ကောင်းလာဖွယ် ရှိတယ်လို့ ခန့်မှန်းကြပါတယ်။ ယမင်းးခင်၊Source: Angel commodities