တမူး နယ်စပ်ကုန်သွယ်ရေးစခန်းနယ်မြေတွင် တစ်ဦးတည်းပိုင်ထုတ်ကုန်/သွင်းကုန် မှတ်ပုံတင် ကတ်ပြုလုပ်ရေး၊ စားသုံးသူ အကာအကွယ်ပေးရေး၊ ကုန်သွယ်မှုမြှင့်တင်ရေးနှင့် တရားမဝင် ကုန်သွယ်မှု များ လျော့နည်းပပျောက်ရေးအတွက် Mobile Team ဖြင့် ဆောင်ရွက်မည့်အစီအစဉ်များကို ဒီဇင်ဘာ ၂၇ ရက်တွင် ကုန်သွယ်မှုမြှင့်တင်ရေးညှိနှိုင်းဆွေးနွေးပွဲတွင်လည်းကောင်း၊ ဒီဇင်ဘာ ၅ ရက်မှ ၆ ရက် အထိ ကျင်းပပြုလုပ်သည့် ကလေး-တမူး-ကလေး၀ နယ်စပ်ကုန်သည်ကြီးများအသင်း၏ ဆဋ္ဌမအကြိမ် မြောက် သင်းလုံး ကျွတ်အစည်းအဝေးနှင့် ဗဟိုအလုပ်အမှုဆောင်အစည်းအဝေးများတွင် တမူးနယ်စပ် ကုန်သွယ်ရေးစခန်း၊ တာဝန်ခံညွှန်ကြားရေးမှူး ဦးဝင်းတင့်မှ ရှင်းလင်းဆွေးနွေးခြင်းများ ဆောင်ရွက်ခဲ့ ပါတယ်။

အာဆီယံ-အိန္ဒိယနိုင်ငံများ ဆက်သွယ်ရေးလမ်းကြောင်းပေါ် ကားမောင်းခရီးစဉ်ကို အင်ဒိုနီးရှားနိုင်ငံမှ စတင်ထွက်ရှိခဲ့ရာ ယခုလ ၁၃ ရက်နေမှာ မန္တလေးမြို့ကိုရောက်ရှိပြီး ၁၄ ရက် နံနက်မှာ မန္တလေးမြို့မှ ထွက်ခွာမှာဖြစ်ကြောင်း သိရပါတယ်။

ဗီယက်နမ်နိုင်ငံဟာ လာမယ့်နှစ်ဆန်းမှစပြီး သကြား တင်သွင်းမှုအပေါ် အခွန် ၄၀ ရာခိုင်နှုန်းကောက်ခံမယ်လို့ သိရတယ်။၂၀၁၃ ခုနှစ်မှာ  ဗီယက်နမ်သကြားပိုလျှံမယ် ခန့်မှန်းပြီး ပြည်တွင်းသကြားထုတ်လုပ်တဲ့ လုပ်ငန်းတွေကို အကာအကွယ်ပေးဖို့နဲ့ သွင်းကုန် အခွန်တိုးမြှင့်ကောက်ခံဖို့ စီစဉ်ရခြင်းဖြစ်တယ်လို့ ဘဏ္ဍာရေးဝန်ကြီးဌာနက ထုတ်ပြန် ထားတယ်။

အမေရိကန်ရဲ့ပြောင်းဈေးနှုန်း မြင့်တက်တာကြောင့် လာမယ့်နှစ်မှာ တရုတ် နိုင်ငံမှ ပြောင်းတင်သွင်းမှုဟာ ထက်ဝက်ကျော် ကျဆင်းဖွယ်ရှိကြောင်း၊ ပြောင်း အထွက် စံချိန်တင်မြင့်တက်လာပေမဲ့ တစ်နိုင်ငံလုံး စားသုံးမှု မြင့်တက်နေခြင်းဟာ ပြည်တွင်းရောင်းချမှုကို အဟန့်အတားဖြစ်စေနိုင်တယ်လို့ တရုတ်နိုင်ငံတော် သီးနှံနှင့် ဆီသတင်း အချက်အလက် စင်တာ (CNGOIC)အရာရှိတစ်ဦးမှ ခန့်မှန်းထားပါ တယ်။ ပြောင်းစားသုံးမှုမှာ ဒုတိယအများဆုံးဖြစ်တဲ့ ကမ္ဘာ့ပြောင်း ဒုတိယအများဆုံး သုံးစွဲတဲ့ တရုတ်နိုင်ငံဟာ ၂၀၁၃ စက်တင်ဘာလမှာ ကုန်ဆုံးမယ့် ပြောင်းရာသီမှာ ပြီးခဲ့တဲ့ နှစ်ထက် ၅၄ ရာခိုင်နှုန်းကျဆင်းပြီး၊ တန်ချိန် ၂ ဒသမ ၄ သန်းခန့်သာပြောင်း တင်သွင်းမှုရှိမယ်လို့ ဆိုပါတယ်။ အမေရိကန်မှာ မိုးခေါင်ခြောက်သွေ့ခြင်းကြောင့် ဈေးနှုန်းတွေမြင့်တက်လာတဲ့အတွက် ဝယ်ယူမှု လျှော့ချလာခြင်းဖြစ်ကြောင်း သိရပါ တယ်။

ဒါ့ပြင် ဝက်မွေးမြူရေး ချဲ့ထွင်လာတာကြောင့် စားသုံးမှုဟာ တန်ချိန် ၂၀၅ ဒသမ ၆ သန်းရှိပြီး ယခင်နှစ်ထက် ၉ ဒသမ ၆ ရာခိုင်နှုန်းမြင့်တက်နိုင်တယ်လို့ ဆိုပါတယ်။ တရုတ်နိုင်ငံရဲ့ ပြည်တွင်းပြောင်းထွက်ရှိမှုက ယခုနှစ်မှာ တန်ချိန် ၂၀၈ ဒသမ ၁၃ သန်းရှိပြီး ယခင်ထက် ၈ ရာခိုင်နှုန်းမြင့်တက်ခဲ့ပါတယ်။ တရုတ်နိုင်ငံဟာ ပြည်တွင်း၊ ပြည်ပဈေးနှုန်းအပေါ် မူတည်ပြီး၊ ၂၀၁၃ ဧပြီလတိုင်အောင် ပြောင်း တင်သွင်းရဖွယ်မရှိဘူးလို့ CNGOIC မှ ဆိုပါ တယ်။ ကမ္ဘာ့ပြောင်း ထိပ်တန်းတင်ပို့တဲ့ အမေရိကန်မှာ မိုးခေါင်မှုဆိုးဝါးတာကြောင့် အမေရိကန်ပြောင်းဈေးမြင့် တက်ခဲ့ရာ တရုတ်နိုင်ငံ တောင်ပိုင်း Shenzhen ပြည်တွင်းပြောင်းဈေးထက် ၄ ရာခိုင်နှုန်း ဝန်းကျင် ပိုမိုတယ်လို့ သိရပါတယ်။ ပြောင်းစံချိန်တင် ထွက်ရှိပြီးနောက် ပြည်တွင်း ပြောင်းဈေးမှာ လျော့ကျခဲ့ပြီး၊ ပြည်တွင်းပြောင်း ပြုပြင်ထုတ် လုပ်သူတွေကလည်း ကော်မှုန့်ဖြူနဲ့ အရက်လို တန်ဖိုး မြင့်ထုတ်ကုန်တွေ ရောင်းချမှုနည်းတာကြောင့် ထုတ်လုပ်မှု ကို လျှော့ချထားတယ်လို့ သိရပါတယ်။ လာမယ့်နှစ်အတွင်း တရုတ်ဝယ်လက်တွေက အာဂျင်တီး နားနဲ့ ယူကရိန်းတို့မှ ပြောင်း တင်သွင်းလိမ့်မယ်လို့ CNGOIC မှ ဆိုကြောင်း စင်ဟွာ သတင်းဌာနမှ ဖော်ပြထားပါတယ်။                              ယမင်းခင်