ပြည်ဈေးကွက်ကို ဒီတစ်ပတ်မှာ နေပြည်တော်၊ တပ် ကုန်းဘက်မှ (မိုးထောင်)နဲ့ (အရှည်)ငရုတ်ခြောက် အသစ်များ ပိဿာ ၃၀ ဝင်အိတ်၊ ၆၀၀ ခန့်ဆက်လက်အဝင်ရှိပြီး၊ မကွေး၊ အောင်လံဘက်မှအဝင်ရှိတဲ့ ငရုတ်ခြောက် အဟောင်းများ ဈေးကွက်အတွင်း စက်တင်ဘာ တတိယတပတ်လောက်မှာ ပစ္စည်းလက်ကျန် ပြတ်သွားကြောင်း သိရပါတယ်။ တပ်ကုန်း ငရုတ်ခြောက်အသစ်များမှာ အစိုများနေသေး၍ ငရုတ်သီးမှုန့် လုပ်ငန်းရှင်များမှ အဝယ်မလိုက် သေးဘဲ ပွဲရုံများ၌ ဧရာဝတီ တိုင်းသဒေသကြီး၊ ရခိုင်ပြည်နယ်ဘက်သို့ ပိဿာချိန် ၆၀၀၀ ခန့် အရောင်းအဝယ် ဖြစ်ခဲ့ကြောင်း သိရပါတယ်။ ဈေးနှုန်း အနေနဲ့ ငရုတ်ခြောက်အရှည်၊ တစ်ပိဿာကို ၂၅၀၀ ကျပ် (မိုးထောင်) ၂၁၀၀-၂၂၀၀ ကျပ်တို့နဲ့ ပုံမှန်အရောင်းအဝယ် ဖြစ်ခဲ့ကြောင်း သိရပါတယ်။ဝင်းဝင်းခိုင် - ပြည်

အောက်တိုဘာပထမပတ်အတွင်းမှာတော့ ပင်လယ်ရေ ကြောင်း ကုန်သွယ်မှုလမ်းမှ ပြည်ပကို  မန်ကျည်း ၂၅ တန် တင်ပို့ခဲ့တယ်လို့ သိရပါတယ်။ တင်ပို့ခဲ့တဲ့နိုင်ငံ က ပါကစ္စတန် နိုင်ငံဖြစ်ပါတယ်။ ယခင်သီတင်းပတ်မှာတော့ မန်ကျည်းတင်ပို့ မှုက တန် ငါးဆယ်ရှိခဲ့တာကြောင့် ဒီတစ်ပတ်မှာ မန်ကျည်း တင်ပို့မှု လျော့ခဲ့ပါတယ်။  FOB ဈေးက တစ်တန်ကို ပျမ်းမျှ ကန်ဒေါ်လာ ၃၅၀ ဝန်းကျင်ရရှိခဲ့တယ်လို့ သိရပါတယ်။MIRT (DOT)

ဟိုပုံးနနွင်းကတော့ ဒီတစ်ပတ်မှာ အနည်းငယ်အရောင်းအဝယ်ဖြစ်နေပါတယ်။ တစ်ပိဿာကို ၈၄၀ ကျပ်ဈေးနဲ့ ရန်ကုန် ဝယ်လက်တွေဝယ်ယူနေတာကြောင့် တစ်ပတ်ကိုပိဿာချိန် ၆၀၀၀ ခန့် အရောင်းအဝယ်ဖြစ်နေ တယ်လို့သိရပါတယ်။

မြန်မာ-ဘင်္ဂလားဒေ့ရှ်နယ်စပ်ရှိ စစ်တွေမှ ကန်ဒေါ်လာသုညဒသမ ၀၀၁ သန်း တန်ဖိုးရှိ အုံတုံခေါက် ၅ တန်ကို အောက်တိုဘာလ ၃ ရက်မှ ၉ ရက်အတွင်းမှာ အပို့ရှိတယ်လို့စစ်တွေနယ်စပ်မှ သတင်းရရှိပါတယ်။ ယခုအပတ်မှာ မြဝတီ နယ်စပ် မှလည်းကန်ဒေါ်လာ သုည ဒသမ ၀၀၁ သန်းတန်ဖိုးရှိ ကံ့ကော်ပွင့်ခြောက် တစ်တန် ကျော်လည်းအပို့ရှိခဲ့ပါတယ်။ မူဆယ်နယ်စပ်မှလည်း ကန်ဒေါ်လာ ၁ ဒသမ ၆၀၇၇ သန်းတန်ဖိုးရှိ ပရဆေး ကုန်ကြမ်း ၈၉၈ တန်ကျော်အပို့ရှိခဲ့ပါတယ်။ မူဆယ်နယ်စပ်မှ ယခုအပတ်တင်ပို့တဲ့ ပရဆေးကုန်ကြမ်းတွေကတော့ ဝဥခြောက်၊ ချဉ်ပေါင်ဖာလာ (အခွံပါ)၊ သီဟိုဠ်စေ့ (အခွံမပါ)၊ နနွင်းတက်၊ မိကျောင်းကွမ်းဖတ်စေ့၊ နေလဲစေ့၊ ဆီးသီးခြောက်၊ ကွမ်းသီးခွံ၊ တောဂျူးမြစ်၊ ကွမ်းစားဂမုန်း၊ ရွေးရွက်၊ စကားပန်း ပွင့်ခြောက်၊ ကြောင်ပန်းစေ့၊ ဆေးမြင်းခွာ၊ ခပေါင်းစေ့၊ ဒရင်ကောက်မြစ်၊ တောင်လုံး ကျော်၊ တောချင်း၊ ဆီးဆံ၊ ကြက်ဆူစေ့နဲ့ ရှိန်းခိုတို့ဖြစ်ပါတယ်။ ယခင်အပတ်ကထက် ဝဥခြောက်၊ ချဉ်ပေါင်ဖာလာ (အခွံပါ)၊ နေလဲစေ့၊ ကွမ်းစားဂမုန်း၊ ရွေးရွက်၊ ကြောင် ပန်းစေ့၊ ဒရင်ကောက်မြစ်နဲ့ တောဂျင်းတို့အပို့ပိုခဲ့ပါတယ်။ ယခုအပတ်မှာ မူဆယ်မှ ပရဆေးတင်ပို့မှုဟာ ယခင်အပတ် တင်ပို့မှုထက် တန်ချိန်အားဖြင့် ၃၅၃ တန်ကျော် လျော့နည်းခဲ့သော်လည်း တန်ဖိုးအားဖြင့် ကန်ဒေါ်လာသုညဒသမ ၀၁၇၇ သန်း ပိုမိုဆောင်ရွက်နိုင်ခဲ့ပါတယ်။ တမူးနယ်စပ်မှ ယခုအပတ်မှာ ကန်ဒေါ်လာ သုည ဒသမ ၀၀၈ သန်းတန်ဖိုးရှိ မင်သော် သုည ဒသမ ၅ တန်နဲ့ ဟင်းရိုင်းဖြူသုညဒသမ ၁၈ တန်အသွင်းရှိခဲ့ရာ ယခင်အပတ်ကထက် ကန်ဒေါ်လာသုညဒသမ ၀၀၆ သန်းဖိုး အသွင်းပိုမိုခဲ့ပါတယ်။                          MIRT(DOBT)