ရန်ကုန်ဝယ်လက်အေးလို့ မန်းမတ်ပဲလည်း ဈေးအေး               မန်းပဲဈေးကွက်သို့ မြင်းမူ၊ ရွှေဘို၊ တန့်ဆည်၊ စစ်ကိုင်း၊ မတ္တရာတို့မှ မတ်ပဲများနေ့စဉ်တစ်တင်းခွဲအိတ် ၅ဝဝ မှ ၁ဝဝဝ ဝင်ရောက်လျက်ရှိပါတယ်။ ယခင်တစ်ပတ်က မတ်ပဲတစ်ပိဿာ ၁၁၆၇ ကျပ်မှ ယခုတစ်ပတ် ၁၁ဝဝ ကျပ်သို့ ဈေးအေးလာပါတယ်။ ရန်ကုန်ဝယ်လက်အဝယ်အေးလို့ ဈေးအေးလာတယ်လို့ ဈေးကွက်က ဆိုပါတယ်။ နေ့စဉ်ပုံမှန်အိတ် ၅ဝဝ ဝန်းကျင် အရောင်းအဝယ်ဖြစ်ပြီး အဝယ်သွက်တဲ့ နေ့များမှာတော့ အိတ် ၁၅ဝဝ ဝန်းကျင်အရောင်းအဝယ်ဖြစ်တယ်လို့ သိရပါတယ်။ ကျော်ကျော်မိုး

ဝယ်လိုအားကောင်းလို့ မတ်ပဲဈေးမြင့်လာ                 ဟင်္သာတဈေးကွက်အတွင်းသို့ မတ်ပဲသစ်များ အဝင်လှိုင်လာသလို ဝယ်လိုအားလည်းကောင်းလာပါတယ်။ ယခင်တစ်ပတ်မတ်ပဲဈေးက ပိဿာ ၂ဝ ဝင် တစ်တင်းကို ၂၂၄ဝဝ ကျပ်နဲ့ အရောင်းအဝယ်ဖြစ်ခဲ့ပြီး ယခုတစ်ပတ်မှာတော့ မတ်ပဲ တစ်တင်းကို ၂၄၁ဝဝ ကျပ်ဖြစ်လို့ ယခင်တစ်ပတ်နဲ့ နှိုင်းယှဉ်ရင် တစ်တင်း ၁၇ဝဝ ကျပ်ဈေးမြင့်လာပါတယ်။ ရောင်းဝယ်မှုအနေနဲ့လည်း ရန်ကုန်ဝယ်လက်များ လည်းရှိသလို ဒေသတွင်း လှောင်လက်ကုန်သည်ကြီးများရဲ့ ဝယ်လိုအားလည်း ရှိနေပါတယ်။ တင်ပို့မှုအနေနဲ့ ရန်ကုန်ဈေးကွက်ကို ယခုတစ်ပတ်အတွင်း တစ်တင်း ခွဲဝင်အိတ် တစ်သောင်းခန့် တင်ပို့နိုင်တယ်လို့ သိရပါတယ်။ အေးအေးခိုင်

တစ်ပတ်အတွင်း နယ်စပ်မှ ပရဆေးတင်ပို့မှု တန် ၁ဝဝဝ နီးပါးရှိ                    မတ်လ ၂ ရက်မှ ၈ ရက်ထိကာလအတွင်း မြန်မာတရုတ်နယ်စပ်ရှိ မူဆယ် ၁ဝ၅ မိုင်ကုန်သွယ်ရေးဇုန်မှ ကန်ဒေါ်လာ ၁ ဒသမ ၄၆၅ သန်းတန်ဖိုးရှိ ပရဆေးကုန်ကြမ်းတန်ချိန် ၉၉၈ တန်ကျော်တင်ပို့နိုင်ခဲ့ပါတယ်။ယခင်အပတ်က ၆၉၈ တန်ကျော် တင်ပို့နိုင်ခဲ့တာမို့ ယခုအပတ်မှာ တန်ချိန် ၃ဝဝ ခန့် ယခင်အပတ်ကထက် တင်ပို့မှုပိုမိုခဲ့ပါတယ်။ ယခင်အပတ်က တင်ပို့ခဲ့ခြင်းမရှိတဲ့ ကျောက်ဂျင်း၊ မျောက်ဥခြောက်တို့ကို ယခုအပတ်မှာ တင်ပို့မှုရှိတာတွေ့ရပါတယ်။ ယခုအပတ်မှ တင်ပို့တဲ့ ပရဆေးကုန်ကြမ်းတွေကတော့ မိချောင်းကွမ်းဖတ်စေ့၊ နေလဲစေ့၊ ကျောက်ဂျင်း၊ နနွင်းတက်၊ ဒရင် ကောက်မြစ်၊ ကွမ်းစားဂမုန်း၊ ကြောင်လျှာစေ့၊ မျောက်ဥခြောက်၊ မာလာဥနဲ့ မာလာဥခေါင်း တို့ဖြစ်ပါတယ်။ တမူးနယ်စပ်ကနေ ကန်ဒေါ်လာ ဝ ဒသမ ဝဝ၂ သန်းတန်ဖိုးရှိရှိန်းခို ၁ ဒသမ ၂ တန်တင်သွင်းမှု ယခုအပတ်မှာ ရှိတယ်လို့ သိရပါတယ်။ MIRT(DOBT) 

ဈေးကွက်ကို နနွင်းအဝင်လျော့လို့ အိန္ဒိယနနွင်းဈေးမြင့်လာ               အိန္ဒိယနနွင်းအဓိက ဈေးကွက်ဖြစ်တဲ့ နီဇမ်မာဘတ်နဲ့ အီရော့ဈေးကွက်တွေမှာ နနွင်းအဝင်လျော့ပြီး လှောင်လက်များ အဝယ်သွက်တာကြောင့် မတ်လ ၉ ရက်နေ့မှာလည်း နနွင်းဈေးဆက်မြင့်ခဲ့တယ်လို့ သိရပါတယ်။ လက်ငင်းဈေးခိုင်မာ လာခြင်းနဲ့အတူ ကြိုပွိုင့်ဈေးလည်းဆက်လက်မြင့်တက်နေတယ်လို့ သိရပါတယ်။ ဒါပေမဲ့ လာမယ့်သီတင်းပတ်များအတွင်း နနွင်းအသစ် ဝင်ရောက်မှု တိုးလာနိုင်လို့ ဈေးကွက်ဈေးနှုန်းကို သက်ရောက်နိုင်တယ်လို့ ခန့်မှန်းကြပါတယ်။ အီရော့နဲ့ နီဇမ်မာဘတ်ကို နနွင်းဝင်ရောက်မှုဟာ အိတ် ၁၈ဝဝဝ နဲ့ ၅ဝဝဝ အသီးသီးရှိတယ်လို့ သိရပါတယ်။ အတ္တရာပရာဒေ့ရှ်ရဲ့ အဓိကဈေးကွက်ဖြစ်တဲ့ နီဇမ်မာဘတ်မှာ နနွင်းဈေးက တစ်တန်ကို ရူပီး ၉၅၂ ဒသမ ၅ (ကန်ဒေါ်လာ ၂၁ ဒသမ ဝ၅) မြင့်တက်ပြီး ရူပီး ၁၁၈၆၆၆ ဒသမ ၅ (ကန်ဒေါ်လာ ၂၆၂၃) ဈေးဖြစ်ခဲ့တယ်လို့ သိရပါတယ်။ ၂ဝ၁ဝ-၁၁ ရာသီအတွင်း နနွင်းထုတ်လုပ်မှုဟာ ၇ဝ ကီလိုပါအိတ်ပေါင်း ၆၉ သိန်းရှိနိုင်လို့ ယခင်နှစ် ထွက်ရှိတဲ့ အိတ် ၄၈ သိန်းထက်ပိုမိုမယ်လို့ ခန့်မှန်းကြပါတယ်။ ကာလတိုအတွင်းမှာတော့ ပြည်တွင်းပြည်ပ ဝယ်လိုအားနဲ့ ဈေးကွက်တွေကို နနွင်းဝင်ရောက်မှုအပေါ် မူတည်နေတယ်လို့ ဆိုပါတယ်။ ယမင်းခင်၊ှSource: Angel commodities