ဈေးကွက်အတွင်း ဈေးအမြင့်ဆုံးမှာငြိမ်နေတဲ့ ပဲကြီး          ယခုတစ်ပတ်ပြည်ဈေးကွက်မှာ ဈေးအမြင့်ဆုံးဖြစ်နေတဲ့ ပဲအမျိုးအစား ကတော့ ပဲကြီးအမျိုးအစား ဖြစ်ပါတယ်။ ပဲကြီးဈေးနှုန်းများမှာ ပဲကြီး (ကမ်းနား) က ၃၅ဝဝဝ ကျပ်၊ ရွှေကွျှန်းမှာ ၃၆ဝဝဝ ကျပ်ဖြင့် ယခင်အပတ်အတိုင်း ဈေးငြိမ် လျက်ရှိကာ ပဲကြီး ကမ်းနားမှာ တစ်ရက်အိတ် ၂ဝဝ ခန့်နှင့် ပဲကြီးရွှေကျွန်းမှာအိတ် ၁ဝဝ အထိ အရောင်းအဝယ်ဖြစ်လာတယ်လို့ သိရပါတယ်။ နိုဝင်ဘာလအတွင်း ပဲကြီးကမ်းနားသာ ပဲကြော်၊ ပဲလှော်လုပ်ငန်းသမားများဖြင့် အဝယ်ရှိနေခဲ့ပြီး ယခု ဒီဇင်ဘာလတွင် ပဲကြီး ရွှေကျွန်းပါ အရောင်းအဝယ် သွက်လာတယ်လို့ သိရပါ တယ်။                                   ခင်ဆွေဝင်း 

ဝယ်လက်စုံတဲ့ မုံရွာကုလားပဲ             မုံရွာကုန်စည်ဒိုင် ဒီဇင်ဘာလ ဒုတိယပတ် ကုလားပဲဈေးကွက်မှာ ဒေသတွင်း လုပ်ငန်းသုံးသမားများနဲ့ နယ်အဝယ်ပုံမှန်ရှိခဲ့လို့ အရောင်းအဝယ် သွက်နေဆဲဖြစ်တယ်လို့ သိရပါတယ်။ ယခုရက်ပတ်ထဲမှာ ပဲမှုန့်လိုင်းသမားတွေအနေနဲ့ မရှိမဖြစ် လိုအပ်နေတဲ့ ကုလားပဲရိုးရိုးတစ်တင်းကို ၂ဝဝဝဝ ကျပ်၊ ၂ဝ၅ဝဝ ကျပ်ဈေးများနဲ့ ဝယ်ယူမှုရှိခဲ့ပြီး အခြားကုလားပဲဈေးတွေအနေနဲ့ တိုင်ပေတစ်တင်း ၂၁ဝဝဝ ကျပ်မှ ၂၁၅ဝဝ ကျပ်၊ ဗွီတူး တစ်တင်း ၂၃၅ဝဝ ကျပ်မှ ၂၃၇ဝဝ ကျပ်နဲ့ ၉၂၉ တစ်တင်း ၂၃၅ဝဝ ကျပ်အသီးသီး ဈေးတန့်နေတယ်လို့ သိရပါတယ်။ ဒီ တစ်ပတ်အတွင်း မုံရွာကုန်စည်ဒိုင် ကုလားပဲဈေးကွက်မှာ တစ်ရက်ကို အိတ် ၅ဝဝ မှ ၇ဝဝ ကြား နေ့စဉ် အရောင်းအဝယ်ဖြစ်ခဲ့ပြီး မန္တလေးကို တင်း ၂ဝဝဝ ခန့်နဲ့ ပခုက္ကူကို တင်း ၆ဝဝ ခန့်စီးထွက်ခဲ့တယ်လို့ ဈေးကွက်က ဆိုပါတယ်။                                ထွန်းလှိုင် 

အရည်အသွေးကောင်းရင် ဈေးကောင်းရနေတဲ့ မန်းပဲတီစိမ်း              မန်းဈေးကွက်တွင် ရောင်းဝယ်အားအကောင်းဆုံး သီးနံှတစ်ခုဖြစ်တဲ့ ပဲတီစိမ်းကို တရုတ်ဝယ်လက်အပြင် ရန်ကုန်  ဝယ်လက်နဲ့ ဒေသတွင်း ပဲခွဲစက်လုပ်ငန်းရှင်များမှပါ ဝယ်ယူနေတာကို တွေ့ရပါတယ်။ ဈေးကွက်အတွင်းသို့ မကွေး၊ အောင်လံ ဒေသများမှ ပဲတီစိမ်းအသစ်များ ဝင်ရောက်မှုရှိသလို ဝင်ရောက်လာတဲ့ ပဲတီစိမ်းအသစ်များဟာ ဈေးကွက်အတွင်း ရောင်းဝယ် နေကြတဲ့ ပဲတီစိမ်းအဟောင်းထက် ပစ္စည်းအရည်အသွေးကောင်းနေတာကြောင့် ဈေးမာနေတာကို တွေ့ရပါတယ်။ ပစ္စည်း အရည်အသွေးကောင်းရင် တရုတ်ဝယ်လက်ဆွဲအားကောင်းသလို ရောင်းဝယ်အားကလည်း ဆက်ပြီး ကောင်းနေမယ်။ ယခု ဆိုရင် အရည်အသွေးနိမ့်တဲ့ ပစ္စည်းတွေရောင်းဝယ်မှုအေးနေတယ်လို့ ရောင်းဝယ်နေကြတဲ့ ကုန်သည်များမှ ပြောကြားပါတယ်။ ယခင်တစ်ပတ်မှာ ပဲတီစိမ်းထိပ်စ တစ်ပိဿာ ၁၅၁၁ ကျပ်၊ တစ်တန် ၆၂၅၃၂ဝ ကျပ်၊ လတ်စ ၁၃၃၃ ကျပ်၊ တစ်တန် ၈၁၆၃၁ဝ ကျပ်၊ အောက်စ ၁၁၅၆ ကျပ်၊ တစ်တန် ၇ဝ၇၉၂ဝ ကျပ်ဈေးတို့ဖြင့် ရောင်းဝယ်ခဲ့ကြပြီး ယခုတစ်ပတ်မှာတော့ ပဲတီစိမ်းထိပ်စ တစ်ပိဿာ ၁၅၂ဝ ကျပ်၊ တစ်တန် ၉၃ဝ၈ဝဝ ကျပ်၊ လတ်စ တစ်ပိဿာ ၁၂၄၄ ကျပ်၊ တစ်တန် ၇၆၁၈ဝဝ ကျပ်၊ အောက်စ ၉၇၅ ကျပ်၊ တစ်တန် ၅၉၈၉၁ဝ ကျပ်ဈေးတို့ဖြင့် ထိပ်စ ဈေးမြင့်လာပြီး အရောင်းအဝယ်ဖြစ်နေကြပါတယ်။ တင်ပို့မှု အနေဖြင့် တစ်ပတ်အတွင်း တရုတ်သို့ ၈၇ဝ တန်၊ ရန်ကုန်သို့ ၂၉ဝ တန် တင်ပို့မှုရှိခဲ့ကြောင်း သိရပါတယ်။                     ကျော်ကျော်မိုး 

 ပြည်ပဲတီစိမ်းအဝင်များသလို အရောင်းအဝယ်သွက်နေ              ပဲခူးတိုင်းဒေသကြီးအနောက်ပိုင်းအတွင်း ပဲတီစိမ်းစိုက်ဧက ၂၃၄၇၃ ဧကလျာထားပြီး ယခုဒီဇင်ဘာ လလယ်အထိ ၂၁၈၃ဝ ဧက စိုက်ပျိုးပြီးဖြစ်ပါတယ်။ ပဲတီစိမ်းဈေးနှုန်းကတော့ တစ်တင်းကို ၂၅၅ဝဝ ကျပ်ဈေးရှိခဲ့ပြီး ယခင်အပတ်ကထက် ၅ဝဝ ကျပ်ခန့် ဈေးမြင့်လာခဲ့ပါတယ်။ ပြည်ဈေးကွက်အတွင်းသို့ အောင်လံဖက်မှ အဝင်ရှိသလို တိုင်းဒေသကြီးအတွင်း ပေါက်ခေါင်း၊ ပန်းတောင်း၊ ပေါင်းတလည်တို့မှလည်း နေ့စဉ်အဝင်ရှိခဲ့ပါတယ်။ ယခုတစ်ပတ်အတွင်း အိတ် ၂ဝဝဝ ကျော် အဝင်ရှိခဲ့ပြီး ရန်ကုန်သို့ ၂၈၅ဝ အိတ်တင်ပို့နိုင်ခဲ့ကာ မြို့တွင်းရောင်းဝယ်မှုမှာတစ်ရက်ကို အိတ် ၁၅ဝဝ ခန့် အရောင်းအဝယ် ဖြစ်နေတယ်လို့ သိရပါတယ်။                                                                                                    ခင်ဆွေဝင်း