ဈေးကွက် လမ်းကြောင်းပွင့်လို့ ဆောင်းနှမ်းစိုက်သူများလာနိုင်                       မုံရွာနယ်မှာ စိုက်ပျိုးခဲ့ကြတဲ့ မိုးနှမ်းတချို့ အထွက်လျော့လို့ တောင်သူတွေ တွက်ခြေမကိုက်ခဲ့ကြပေမယ့် နှမ်းကို ပြည်ပ တိုက်ရိုက် တင်ပို့ခွင့်ပြုပြီးတဲ့နောက် တဖြည်းဖြည်းတက်လာမယ့် နှမ်းဈေးကို မျှော်လင့်ရင်း တချို့ကျေးရွာတွေမှာ ဆောင်းနှမ်း ကြဲနေကြပြီလို့ သိရပါတယ်။ မုံရွေးအုပ်စု နွားထိမ်းကျေးရွာက ယာတောင်သူ ဦးသန်းဝင်းကတော့ ယခုရက်ပတ်အတွင်း မှာ ဆောင်းနှမ်း(နှမ်းဖြူ) ၅ ဧက ကြဲပြီးခဲ့တယ်လို့ ဆိုပါတယ်။ မျိုးဈေးက နှမ်းဖြူ တစ်ပြည်ကို ၁၆၀၀ ကျပ်ပေးရပြီး၊ တစ်ဧကကို ခပ်ထူထူ ၃ ပြည်ကြဲခဲ့တယ်လို့ ဆိုပါတယ်။ စက်တင်ဘာ ၁၅ ရက်အတွင်း ဖြစ်ပေါ်ခဲ့တဲ့ နှမ်းဈေးတွေကို လေ့လာ ကြည့်ရင် နှမ်းညိုတစ်တင်း ၁၇၂၀၀ ကျပ်မှ ၁၉၀၀၀ ကျပ်၊ နှမ်းဝါတစ်တင်း ၁၈၀၀၀ ကျပ်မှ ၁၉၇၀၀ ကျပ်၊ နှမ်းနီတစ်တင်း ၁၈၀၀၀ ကျပ်မှ ၁၉၆၀၀ ကျပ်နဲ့ နှမ်းဖြူတစ်တင်း ၂၀၀၀၀ ကျပ်မှ ၂၁၀၀၀ ကျပ် တဖြည်းဖြည်း တက်ဈေးရလာတာတွေ့ရပြီး၊ ယခု ၁၅ ရက်အထိ မန္တလေးကို တင်း ၃၀၀၀ ခန့် စီးထွက်သွား တာတွေ့ရပါတယ်။ ယာတောင်သူတွေအနေနဲ့ ဆက်သွယ်ရေးစနစ်တွေ တိုးတက်ကောင်းမွန်လာတဲ့ ယနေ့ခေတ် မှာ ဈေးကွက် သတင်းအချက်အလက်တွေ ရယူပိုင်ဆိုင်လာကြပြီး၊ အခုလို နိုင်ငံတော်က နှမ်းနဲ့မြေပဲ ကို ပြည်ပသို့ လွတ်လပ်စွာ တင်ပို့ရောင်း ချနိုင်ပြီဖြစ်တဲ့အတွက် ပွင့်လင်းလာမယ့် ဈေးကွက်မျှော်လင့်ချက်နဲ့ ဆောင်းနှမ်းမျိုးစုံကို အားတက်သရော စိုက်ပျိုးလာကြ မှာ မြင်ယောင်မိပါကြောင်း......။                                   ထွန်းလှိုင်။

နှမ်းတန်ချိန် ၁၀၀၀ ခန့်အထိ ပြည်ပတင်ပို့မှု တက်လာ                   ပင်လယ်ရေကြောင်းက နှမ်းတင်ပို့မှုဟာ ယခင်သီတင်းပတ်က တန်ချိန် ၆၉၀ ခန့်အထိ ရှိခဲ့ရာမှ ယခုတစ်ပတ် (စက်တင်ဘာလ ၄ ရက်မှ ၁၀ ရက်) အတွင်းမှာလည်း တန်ချိန် ၁၀၀၀ ခန့်အထိ ပိုမိုတင်ပို့လာတာ တွေ့ရပါတယ်။ ၂၀၁၁-၁၂ ဘဏ္ဍာနှစ် စက်တင်ဘာလ ၉ ရက်နေ့အထိ စုစုပေါင်း နှမ်းတင်ပို့ပြီးစီးမှုဟာ တန်ချိန် ၂၈၀၀၀ ကျော်ရှိလို့ ယခင်ဘဏ္ဍာနှစ် ကာလတူက တင်ပို့ခဲ့တဲ့ တန်ချိန် ၂၃၀၀၀ ကျော်ထက်ပိုတင်ပို့လာခဲ့ပါတယ်။ နိုင်ငံတော်အစိုးရက နှမ်းနီ၊ နှမ်းညိုကိုပါ တင်ပို့ခွင့်ပြုလိုက်တဲ့အပြင် ပို့ကုန်ဝင်ငွေ တစ်ယူနစ်တန်ဖိုး မြင့်တက်လာတာကြောင့် နှမ်းတင်ပို့မှု တက်လာခြင်းဖြစ်ပါတယ်။ စက်တင်ဘာလ ၁၅ ရက်နေ့ ရန်ကုန် FOB ဈေးမှာ သိပ္ပံနှမ်းနက် တစ်တန် ကန်ဒေါ်လာ ၁၇၀၀-၁၈၅၀၊ နှမ်းနက်တစ်တန် ကန်ဒေါ်လာ ၁၄၀၀-၁၄၅၀၊ နှမ်းဖြူ တစ်တန် ကန်ဒေါ်လာ ၁၂၀၀-၁၂၅၀၊ နှမ်းနီ တစ်တန် ကန်ဒေါ်လာ ၁၁၀၀-၁၁၅၀ နဲ့ နှမ်းညိုတစ်တန် ကန်ဒေါ်လာ ၁၁၀၀-၁၁၅၀ ဈေးအသီးသီးဖြစ်ပေါ်နေတယ်လို့ သိရပါတယ်။MIRT- MAPT

စားအုန်းဆီကြမ်း ဈေးပြန်တက်ပေမယ့် တင်ပို့မှုနည်းခြင်းက ဈေးနှုန်းမြင့်တက်မှုကို ကန့်သတ်နိုင်                 ဘာစာမလေးရှားကုန်စည်ဒိုင်မှာ ယခင်ရက်များက စားအုန်းဆီကြမ်း ကြိုပွိုင့် ဈေး လျော့ကျနေရာမှ စက်တင်ဘာလ ၁၄ ရက်မှာ အဝယ်ပြန်လိုက်လာလို့ ပြန်လည် မြင့်တက်လာခဲ့ပါတယ်။ ဒါပေမယ့် စက်တင်ဘာလ အတွင်း တင်ပို့မှုနည်းခြင်း၊ လက်ကျန်ပမာဏများခြင်းနဲ့ ပတ်သက်လို့ဈေးနှုန်းမြင့်တက်မှုကို ကန့်သတ်နိုင် တယ်လို့ ခန့်မှန်း ထားပါတယ်။ နိုဝင်ဘာလ အခြေခံစံနှုန်း စားအုန်းဆီကြမ်းဈေးဟာ စက်တင်ဘာ ၁၃ ရက်ထက် ၁ ဒသမ ၅ ရာခိုင်နှုန်းမြင့်တက်ပြီး၊ တစ်တန် ရင်းဂစ် ၃၀၆၅ (ကန်ဒေါ်လာ ၉၉၄)ဈေးဖြစ်ခဲ့ပါတယ်။                စက်တင်ဘာလ ပထမ ၁၅ ရက်အတွင်း ပြည်ပဝယ်လိုအားက ယခင်လထက် ၃၁ - ၃၂ ရာခိုင်နှုန်းခန့်ကျဆင်းပြီး၊ တန်ချိန် ၆၅၀၀၀၀ ခန့်သာရှိလို့ ယခုသီတင်းပတ်အတွင်း စားအုန်းဆီဈေးပြန်လည်ကျဆင်း ဖွယ်ရှိတယ်လို့လည်း ခန့်မှန်းထားပါ တယ်။ အမေရိကန်စိုက်ပျိုးရေးဌာနက စက်တင်ဘာ ၁၂ ရက်မှာ အမေရိကန်သီးနှံ ထုတ်လုပ်မှု အလားအလာကို ၁ ရာခိုင်နှုန်း တိုးမြှင့်ခန့်မှန်းလိုက်ခြင်းကလည်း ဈေးနှုန်းကို ပိုမိုကျဆင်းစေနိုင်ပါတယ်။                    ပဲပုပ်ထုတ်လုပ်မှုမြင့်တက်ခြင်းဟာ ပဲပုပ်ဆီဈေးကို ကျဆင်းစေနိုင်တာကြောင့် စားအုန်းဆီထုတ်ကုန်နဲ့ ပဲပုပ်ဆီအကြားကွာဟမှု နည်းသွားနိုင်တယ်လို့ စင်ကာပူ အခြေစိုက်ကုန်သည်တစ်ဦးက ပြောကြားပါတယ်။ မလေးရှားဆိပ်ကမ်းများမှာ အောက်တိုဘာလ သင်္ဘောတင်ရမယ့် သန့်စင်ပြီးစားအုန်းဆီ (Palm olein)ဈေးဟာ အာဂျင်တီးနား ဆိပ်ကမ်းများက ပဲပုပ်ဆီကြမ်းဈေးထက် တစ်တန်ကန်ဒေါ်လာ ၁၄၅ လျော့ကျနေတယ်လို့ လည်း ဆိုပါတယ်။ လွန်ခဲ့တဲ့ လအနည်းငယ်က ဈေး ၂ ခု ကွာဟမှုဟာ ကန်ဒေါ်လာ ၂၀၀-၂၂၀ ခန့်ရှိတယ်လို့ ဆိုပါတယ်။ ဒုတိယ လဝက်အတွင်း အိန္ဒိယနဲ့ တရုတ်တို့က ဝယ်လိုအားတက်မလာဘူး ဆိုရင်ကျန်သီတင်းပတ်တွေမှာ စားအုန်းဆီဈေး ပြန်ကျဆင်းနိုင်တယ်လို့ ကွာလာ လမ်ပူ အခြေစိုက် ကုန်သည်တစ်ဦးက ဆိုပါတယ်။ ဒါပေမယ့် ကမ္ဘာ့စီးပွားရေး အခြေအနေဆိုးဝါးခဲ့ရင် ကာလတိုအတွင်း စားအုန်းဆီဈေး တစ်တန်ရင်းဂစ် ၃၀၀၀ (ကန်ဒေါ်လာ ၉၇၃)မှာရှိနိုင်တယ်လို့ လေ့လာဆန်းစစ်သူ Tanuj Shori  က ပြောကြားပါတယ်။                        လက်ငင်းဈေးကွက်မှာ အောက်တိုဘာလအတွက် သန့်စင်ပြီးစားအုန်းဆီ တစ်တန် ကန်ဒေါ်လာ ၁၀၉၅ နဲ့ ကမ်းလှမ်းခဲ့ပြီး၊ ချက်ချင်းပို့ရမယ့် စားအုန်းဆီ ကြမ်းဈေးဟာ ရင်းဂစ် ၃၀ မြင့်တက်ပြီး၊ ရင်းဂစ် ၃၁၄၀ (ကန်ဒေါ်လာ ၁၀၁၈) ဈေးနဲ့ ကမ်းလှမ်းခဲ့တယ်လို့ သိရပါတယ်။ ယုဇန၊Source: palmoilhq.cm

ပွင့်လန်းလာသည့် ပို့ကုန် အခွင့်အလမ်းနှင့် အတူ ဂျပန်ကိုသွားသည့် နှမ်းညို                   ပို့ကုန်တိုးမြှင့်ရေး ရည်ရွယ်ချက်နဲ့ ၂ဝ၁၁ ခုနှစ် သြဂုတ်လနောက်ဆုံးပတ် မှာ ယခင်က ပြည်ပကိုတင်ပို့ ခွင့်မပြု ခဲ့တဲ့ မြေပဲ၊ မြေပဲဆီ၊ နှမ်းနီ၊ နှမ်းညိုနဲ့ နှမ်းဆီတို့ကို တင်ပို့ခွင့်ပြုလိုက်ပြီဖြစ်ပါတယ်။ ပို့ကုန်ဆိုင်ရာ ဖြေလျော့မှု ပေး လိုက်တဲ့ အခွင့်အရေးကို လက်လွတ် မခံဘဲ ပို့ကုန်လုပ်ငန်းရှင်ကုမ္ပဏီတစ်ခုမှ နှမ်းညိုတန်ချိန် ငါးရာကျော်ကို ဂျပန် နိုင်ငံကိုတင်ပို့ခွင့်ကို ကုန်သွယ်ရေးညွှန်ကြားမှုဦးစီးဌာနမှာ လာရောက် လျှောက်ထားခဲ့ကြောင်းသတင်းရရှိပါတယ်။ ၎င်းကုမ္ပဏီမှ လျှောက်ထားတဲ့ ပို့ကုန်လိုင်စင်ကို ၂၄ နာရီအတွင်းရရှိခဲ့ပြီး ၂ဝ၁၁ခုနှစ် စက်တင်ဘာလ ၁ ရက် မှာ ပို့ကုန်လိုင်စင်ထုတ်ယူရရှိပြီ ဖြစ်ပါ တယ်။                     ပို့ကုန် အခွင့်အလမ်းကို နိုင်ငံတော်မှ ဖွင့်ပေးတာနဲ့အတူ ပို့ကုန်လုပ် ငန်းရှင်တွေကလည်း ဈေးကွက်သစ်တွေ ရရှိရေး၊ ရရှိပြီးဈေးကွက် မပျက်ရေး၊ ပြည်ပကို တိုးခဲျ့တင်ပို့နိုင်ရေး၊ ပို့ကုန် ပမာဏတိုးတက်ရေးတို့အတွက် မိမိတို့ ရဲ့ ပို့ကုန်ပစ္စည်းတွေကို စံချိန်စံညွှန်း၊ အရည်အသွေးပြည့်မီကောင်းမွန်ဖို့ အားထည့်ဆောင်ရွက်နိုင်စေကြောင်း Commerce Journal  မှထပ်ဆင့် ဦးဦးဖျားဖျား သတင်းပေးလိုက်ရပါတယ။် ဒေါက်တာခင်ဦးမေ