မုံရွာမတ်ပဲ ပစ္စည်းအဝင်နည်းလို့ ဈေးပြန်မာ               မုံရွာကုန်စည်ဒိုင် ယခုတစ်ပတ်မတ်ပဲဈေးကွက်မှာ နယ်ပစ္စည်းအဝင် နည်းပြီး အဝယ်လိုက်လာတဲ့အတွက် ဈေးအနည်းငယ်ပြန်မာလာခဲ့ပါတယ်။ အိတ်စပို့အတွက် နယ်ကုန်သည်အဆွဲရှိသလို ဒေသခံခွဲစက်သမားနဲ့ ပဲလက်လီ အရောင်းသမားတွေ အဝယ်သွက်ခဲ့တဲ့အတွက် ယခုလို ဈေးမာလာခြင်းဖြစ် တယ်လို့ပွဲရုံရပ်ကွက်က ဆိုပါတယ်။ ယခုလအတွင်း လဆန်းပိုင်းက တစ်ပိဿာ ၁၁၂၅ ကျပ်ထိဈေးမာခဲ့ရာက ဒုတိယပတ်မှာ တစ်ပိဿာ ၁ဝ၆၅ ကျပ်ထိ ဈေးအေးသွားခဲ့ပြီး ဖေဖော်ဝါရီ ၁၆ ရက်နေ့မှာတော့ တစ်ပိဿာ ၁၁၁ဝ ကျပ်ထိ ဈေးပြန်မာလာတာ တွေ့ရပါတယ်။ ဒေသတွင်း အသုံးများတဲ့ မတ်ပဲခွဲခြမ်းဈေးကတော့ လက်လီဈေး တစ်ပိဿာ ၁၃ဝဝ ကျပ်နဲ့ အရောင်းသွက်ခဲ့တယ်လို့ ပဲလက်လီသမားတွေက ပြောပါတယ်။ ယခုတစ်ပတ်အတွင်း နယ်တင်ပို့မှုအားဖြင့် မန္တလေးကို တင်း ၆ဝဝ နဲ့ ရန်ကုန်ကို တင်း ၄၅ဝ ခန့် ရှိခဲ့ကြောင်း ဈေးကွက်က ဆိုပါတယ်။                                                             ထွန်းလှိုင်

စစ်ကိုင်းတိုင်းဒေသကြီးရဲ့ အနာဂတ်ကြက်သွန်နီ             ယခုဆိုလျှင် စစ်ကိုင်းတိုင်းဒေသကြီးအတွင်းရှိ ကြက်သွန်နီစိုက် ယာမြေတွေမှာ ရာနှုန်းပြည့်နီးပါး စိုက်ပျိုးပြီး သလောက်ဖြစ်နေလို့ ကြက်သွန်ခင်းထွန်တုံးပိတ်ပြီလို့ဆိုရပါမယ်။ ဈေးကွက်ရဲ့အလှည့် အပြောင်း၊ သဘာဝရဲ့ အထောင်းအဖိ၊ ကြီးမြင့်လာတဲ့ စိုက်ပျိုးစရိတ်တွေ ဘယ်လောက်ပိပါစေ၊ ဒေသ တောင်သူတွေ ဇွဲမလျော့ဘဲ စိုက်ခဲ့ကြတာ ဒီနှစ်မှာ ဆောင်းကြက်သွန်လျာထားဧက ၂၈၁ဝဝ ထက်ကျော် ပြီး တိုင်းဒေသကြီးအတွင်း ဧကပေါင်း ၂၈၆၄၈ စိုက်ပျိုးပြီး ၁ဝ၂ ရာခိုင်နှုန်း ရှိခဲ့တယ်လို့သိရပါတယ်။ အဓိကကတော့ အကျိုးအမြတ်ပိုမိုရနိုင်လို့စိုက်ကြရင်း ကြက်သွန်နီရဲ့ ပရိယာယ်တွေကို ကျွမ်းဝင်နားလည်လာပြီး၊ နိုင်နင်းစွာစီးပွားဖြစ် ထုတ်လုပ်နိုင်ကြလို့ စိုက်ကြတယ်လို့ ကြက်သွန်တောင်သူ အများစုရဲ့ သဘောထားကိုသိရ ပါတယ်။ ရှေးယခင်ကြက်သွန်တစ်ပိဿာ ၁ ကျပ်၊ ၂ ကျပ်ခေတ်ကနေ ယနေ့ ၅ဝဝ ကျပ်၊ ၁ဝဝဝ ကျပ် ခေတ်အထိ နှစ်စဉ်မပျက် စွဲစွဲမြဲမြဲစိုက်ကြတဲ့တောင်သူတွေ စစ်ကိုင်းတိုင်း ဒေသကြီးအတွင်းမှာ များစွာရှိပါတယ်။ ကြက်သွန် တောင်သူတွေရဲ့ အဓိကမျှော်လင့်ချက်က ကြက်သွန်နီ ဈေး အဆမတန်ကြီးမြင့်ရေး ကိုယ်ကျိုးစီးပွားသက်သက်မဟုတ်ဘူးလို့ တောင်သူတွေက ပြောပါတယ်။ ကိုယ်ပိုင်ယာ ကိုယ်ပိုင်လုပ်အားနဲ့ဆိုရင် ကြက်သွန်နီ စိုက်စရိတ်ဟာ တစ်ပိဿာ ၁၅ဝ ကျပ်မှ ၂ဝဝ ကျပ် အတွင်းသာရှိပြီး၊ ရင်းနှီးမြှုပ်နံှမှု အကျိုးအမြတ်အနေနဲ့ တစ်ပိဿာရောင်းဈေး ၃ဝဝ ကျပ်မှ ၅ဝဝ ကျပ်အတွင်းရရင် တောင်သူအများစု ကျေနပ်ဝမ်းမြောက်ကြတယ်လို့ ဆိုပါတယ်။ စစ်ကိုင်းတိုင်းဒေသကြီးရဲ့ ကြက်သွန်နီအဓိကရောင်းဝယ်ရာ မုံရွာဈေးကွက်မှ လွန်ခဲ့တဲ့ သုံးနှစ် တာ ကာလ အတွင်းဖြစ်ပေါ်ခဲ့တဲ့ ကြက်သွန်နီဈေးများကို လေ့လာတဲ့အခါ ကြက်သွန်နီအသစ်ပေါ်ချိန် မတ်၊ ဧပြီလတွေမှာ ဖြစ်ပေါ်ခဲ့တဲ့ နှစ်အလိုက်လက်ကားဈေးအနေနဲ့ ၂ဝဝ၈ ခုနှစ်မှာ ၂ဝဝ ကျပ်၊ ၃ဝဝ ကျပ်၊ ၂ဝဝ၉ ခုနှစ်မှာ ၃၅ဝ ကျပ်၊ ၄၅ဝ ကျပ်၊ ၂ဝ၁ဝ ခုနှစ်မှာ ၂ဝဝ ကျပ်၊ ၂၂၅ ကျပ်အသီးသီး ပေါက်ခဲ့ပါတယ်။ ဒီ သုံးနှစ်တာ ကာလအတွင်း ကြက်သွန် တစ်ပိဿာရဲ့ အမြင့်ဆုံးဖြစ်ပေါ်ခဲ့တဲ့ လက်ကား ဈေးအနေနဲ့ ၂ဝဝ၈ ခုနှစ် သြဂုတ်လမှာ ၃၅ဝ ကျပ်၊ ၂ဝဝ၉ ခုနှစ် အောက်တိုဘာလမှာ ၁၃ဝဝ ကျပ်၊ ၂ဝ၁ဝ ခုနှစ် နိုဝင်ဘာလမှာ ၄၃ဝ ကျပ် အသီးသီးဖြစ်ပေါ်ခဲ့ပါတယ်။ ကြက်သွန်နီတောင်သူတွေ တူးဖော်စအချိန်မှာ အနိမ့်ဆုံးဈေး တစ်ပိဿာ ၂ဝဝ ကျပ်ဝန်းကျင်သာ ရရှိခဲ့ပြီး၊ စိုက်ပျိုးစရိတ် တစ်ပိဿာ ၁၈ဝ ကျပ်အထက် ကုန်ကျခဲ့တဲ့ ၂ဝ၁ဝ မတ်၊ ဧပြီ ကြက်သွန် ဈေးကွက်ဟာ စိုက်ပိုျးသူ တောင်သူ ၈၅ ရာခိုင်နှုန်း ကျော်ကျော် ထိခိုက်မှုဖြစ်ပေါ်ခဲ့ရပါတယ်။ သမရိုးကျ နှစ်စဉ်စိုက်ပျိုးနေကြ တောင်သူတွေအတွက် နာတစ်ခါ သာတစ်လှည့်မို့ ဆုံးရှုံးမှုဒဏ်ခံနိုင်ကြပေမဲ့ ဧည့်တောင်သူတွေအတွက် အထိနာခဲ့တဲ့ နှစ်တစ်နှစ် ဖြစ်ခဲ့တာတွေ့ရပါတယ်။ မုံရွာကြက်သွန်ပွဲရုံတန်းမှာ ၂ဝ၁ဝ နိုဝင်ဘာလအတွင်း အစို့ပေါက်ကြက်သွန်ဟောင်းတွေသာ နေရာယူခဲ့ပြီး၊ ရောင်းကုန်ရှားနေတဲ့အတွက်လည်းကောင်း၊ မိုးကြက်သွန်အထွက်နည်းနေတဲ့အတွက် လည်းကောင်း၊ ပြည်တွင်း ဝယ်လိုအားကောင်းနေတဲ့အတွက်လည်းကောင်း ကြက်သွန်ဈေးအနည်းငယ် မြင့်တက် လာခဲ့ပါတယ်။ ၂ဝ၁ဝ နိုဝင်ဘာ၊ ဒီဇင်ဘာလအတွင်း ကြက်သွန်နီအဟောင်းတစ်ပိဿာ ၈၅ဝ ကျပ်ရရှိခဲ့ သလို အသစ်တစ်ပိဿာ ၁၃ဝဝ ကျပ်ထိ ဈေးကောင်းရရှိခဲ့လို့ မိုးစိုက်တောင်သူအချို့ အမောပြေ ခဲ့ကြတယ်လို့ တောင်သူတို့ကပြောပြပါတယ်။                   စစ်ကိုင်းတိုင်းဒေသကြီးအတွင်း ၂ဝ၁ဝ-၁၁ ခုနှစ် ဆောင်းကြက်သွန်နီစိုက်ပျိုးမှုဟာ ဂီရိမုန်တိုင်း ကြောင့် မြေပြင်စိုက်ပျိုးချိန်နောက်ကျခဲ့တဲ့အတွက် လာမဲ့ မတ်လဆန်းမှာသာ အစောဆုံးတူးဖော်နိုင်မှာ ဖြစ်ပြီး၊ အများစုကတော့ ဧပြီလလယ်နဲ့ လကုန်ပိုင်းမှာသာ အလုံးအရင်းတူးဖော်ပြီး ဈေးကွက်ထဲ ဝင်နိုင်မယ်လို့ ကြက်သွန်တောင်သူနဲ့ ပွဲစားများက သုံးသပ်ထားပါတယ်။ ဒီနှစ်ဆောင်းရာသီ ကြက်သွန်နီ စိုက်ပျိုးမှုမှာ ဖြစ်ပေါ်ခဲ့တဲ့ ထူးခြားမှုအနေနဲ့ ဂီရိမိုးမုန်တိုင်းကြောင့် ယာမြေအများစု ထယ်ထွန်စရိတ်ပိုမို ကုန်ကျခြင်း၊ အမျိုးသမီးနေ့စားခတစ်ဦး ၁ဝဝဝ ကျပ်မှ ၁၂ဝဝ ကျပ်ထိတိုးလာခြင်း၊ ရာသီဥတုအခြေအနေ အရ ရေသွင်းမှုအကြိမ်ရေ မြင့်တက်ဖွယ်ရှိခြင်းစတဲ့ စိုက်ပိုျးစရိတ်ကုန်ကျမှု ယခင်နှစ်တွေကထက် အနည်း ငယ် တိုးလာဖွယ်ရှိတယ်လို့ တောင်သူအများစုက ဆိုပါတယ်။                  ဒီနှစ်ဆောင်းကြက်သွန် စိုက်ပျိုးကုန်ကျစရိတ်ဟာ ကိုယ်ပိုင်ယာ၊ ထွန်ရှိတဲ့ တောင်သူတွေအတွက် တစ်ဧက ၅ ဒသမ ၅ သိန်း၊ ၆ ဒသမ ၆ သိန်းခန့်ရှိပြီး၊ ယာမင်းသားတွေအတွက် တစ်ဧက ၆ ဒသမ ၅ သိန်းမှ ၇ ဒသမ ၅ သိန်းထိ ကုန်ကျမှုရှိတယ်လို့ လေ့လာသိရှိရပါတယ်။ လာမယ့် မတ်လလယ်ကနေ ဧပြီလကုန်အတွင်း စစ်ကိုင်းတိုင်းဒေသကြီးမှာစိုက်ပျိုးခဲ့ကြတဲ့ ဆောင်း ကြက်သွန်နီတွေ စဉ်ဆက်မပြတ်ထွက်တော့မှာ ဖြစ်ပါတယ်။ ဖေဖော်ဝါရီလအတွင်း ကွင်းဆင်းမှုအရ ကြက်သွန်ခင်းတွေရဲ့ အခြေအနေဟာ သန်မာထွားကြိုင်း ကောင်းမွန်နေတာ တွေ့ရပါတယ်။ စစ်ကိုင်း၊ မြင်းမူနဲ့ မုံရွာနယ်က တောင်သူတွေနဲ့ ကွင်းဆင်းထိတွေ့မေးမြန်းတဲ့အခါ အခုအခြေအနေအတိုင်းဆိုရင် တစ်ဧကအနိမ့်ဆုံး ပိဿာ ၃၅ဝဝ ကနေ အများဆုံး ၅ဝဝဝ ထိ ထွက်နိုင်ကြောင်း၊ အရည်အသွေး ကောင်းမွန်နိုင်ကြောင်း သုံးသပ်ရပါ တယ်။               ဒီနှစ်ထွက်ရှိလာမဲ့ ဆောင်းကြက်သွန်နီတွေကို တရားမဝင်မှောင်ခိုစီးထွက်မှုမရှိစေရေး ဝိုင်းဝန်း တားဆီးကြမယ်ဆိုရင်ဖြင့် ပြည်တွင်းဈေးနှုန်းတည်ငြိမ်စေမှု၊ ပြည်တွင်းစီးဆင်းမှု ပုံမှန်အတိုင်းစီးဆင်းမှု မှန်ကန်စေရေး စိုက်ပျိုးသူ တောင်သူ၊ ရောင်းဝယ်တဲ့ကုန်သည်ပွဲစား၊ သိုလှောင်သူ အိတ်စ်ပိုတာများ အဆင့်ဆင့် သတ်မှတ်ရာခိုင်နှုန်းအလိုက် ထိုင်သင့်တဲ့အကျိုးအမြတ်များ ခံစားရပြီး၊ စားသုံးသူပြည်သူလူထု မှ ထိုက်သင့်တဲ့ဈေးနှုန်းနဲ့ စားသုံးမှုပြုနိုင်စေခြင်းစတဲ့ အကျိုးကျေးဇူးတွေရရှိနိုင်မှာ ဖြစ်ပါကြောင်း တင်ပြလိုက်ရပါတယ်။ ထွန်းလှိုင်

နမ့်ဆန်နနွင်းတွေ ဈေးကွက်ကိုအဝင်များပေမဲ့ ဈေးမာနေ              ဒီတစ်ပတ်အတွင်း နနွင်းဈေးလည်း အနည်းငယ်ထပ်တက်လာပါတယ်။ နမ့်ဆန်နနွင်းတွေလည်း ဈေးကွက် ကို အဝင်များနေပါပြီ။ နနွင်း(စို)တွေကို တောက်လျှောက်ပြုတ်ပြီး အခြောက်လုပ်နေတာကြောင့် ဒီကရှေ့ဆိုရင် အဝင် ပိုလှိုင်လာတော့မှာဖြစ်တယ်လို့ နမ့်ဆန်က နနွင်းကုန်သည်တွေကဆိုပါတယ်။ နနွင်း (စို) တွေကတော့ အခြောက်ပြုလုပ်ဖို့ ဝယ်ယူနေလို့ ဈေးကွက်မှာ မရှိသလောက်ဖြစ်နေပါပြီ။ နမ့်ဆန်ဈေးကွက်မှာ နနွင်းခြောက် တစ်ပိဿာ ၁၈ဝဝ ကျပ်-၂ဝဝဝ ကျပ်ဈေးရှိပါတယ်။               အောင်ပန်းဈေးကွက်ကိုတော့ ကလောမြို့နယ်ကထွက်တဲ့ ဟဲဟိုးနနွင်း၊ ရွာငံမြို့နယ်၊ မြိုင်ရွာကထွက်တဲ့ မြိုင်နနွင်း ဆိုပြီး (ရိုးရိုး) စတွေဝင်နေပါတယ်။ အဝင်ကတော့ ပုံမှန်ခန့်သာဝင်နေပြီး၊ ရိုးရိုးစလို့ခေါ်တဲ့ နနွင်းခြောက်ကတစ်ပိဿာ ၂၂ဝဝ ကျပ်၊ ၂၃ဝဝ ကျပ်ဈေးရှိပါတယ်။ ဆင်တောင်နနွင်းကတော့ အထွက်လည်း ကောင်း၊ ပစ္စည်းအရည်အသွေး ကလည်း ကောင်းတာကြောင့် ၃၂ဝဝ ကျပ်၊ ၃၃ဝဝ ကျပ်ဈေးရှိပါတယ်။ တောင်ကြီး ဈေးကွက်မှာတော့ နနွင်းတစ်ပိဿာ ၂၃ဝဝ ကျပ်ဈေးရှိတယ်လို့ တောင်ကြီးကုန်စည်ဒိုင်က သိရှိရပါတယ်။ ဧဧခိုင်

၁၅ နှစ်အတွင်း ပြောင်းရောင်းလိုအား အနိမ့်ဆုံးရောက်ရှိ                    ၂ဝ၁ဝ-၂ဝ၁၁ မှာ အမေရိကန်ရဲ့ပြောင်းရောင်းလိုအား ၁၅ နှစ် အတွင်း အနိမ့်ဆုံးအဆင့်ကို ရောက်ရှိနိုင်တာကြောင့် အီသနောထုတ်လုပ်ရေး များအတွက် ပြောင်းရောင်းလိုအား ကျဆင်းဖွယ်ရှိနေကြောင်း သိရပါတယ်။ယခု ရာသီကုန်ချိန်မှာ ရောင်းလိုအား ဘူရှယ် (၇၂၈) သန်းရှိပြီး ယခင်နှစ်ကုန်ချိန်က သိုလှောင်မှု တန်ချိန် (၁ ဒသမ ၇ဝ၈) ဘီလီယံကလည်း ၄၃ ရာခိုင်နှုန်း ကျဆင်း နေကြောင်းသိရပါတယ်။ဇန်နဝါရီလရဲ့ ရောင်းချမှုက ဘူရှယ် (၇၄၅) သန်းရှိကြောင်း သိရပါတယ်။ ၁၉၉၅-၁၉၉၆ နှစ်တွေမှာ သိုလှောင်မှု ၄ ဒသမ ၉၈ ရာခိုင်နှုန်း ကျဆင်းခဲ့ပြီး ယခုနှစ်မှာတော့ ၅ ဒသမ ၄ ရာခိုင်နှုန်းကျဆင်းမယ်လို့ ခန့်မှန်းကြပါတယ်။ ပြောင်းကတော့ အစားအစာနဲ့ ပို့ကုန်တင်ပို့မှုနှစ်မျိုးလုံးအတွက် သတိထား ရမယ့်အခြေအနေဖြစ်နေပါတယ်။ချီကာဂိုကုန်သွယ် ရေးအသင်းရဲ့ပြောင်း ဈေးနှုန်း ကတော့ လ (၃ဝ)အတွင်း အမြင့်ဆုံးဖြစ်နေပြီး စားသုံးမူအတွက် ဝယ်လိုအား ကောင်း နေကာ ရောင်းလိုအားက အားနည်းနေပါတယ်။ Source:Commodity online,KZW