Background
ဟင်္သာတဈေးကွက်မှာ မတ်ပဲကို အိန္ဒိယအတွက် ဝယ်ယူနေတဲ့ ရန်ကုန်ဝယ်လက်က ဈေးချအဝယ်ရှိသလို ဝယ်လိုအားပါကျဆင်း သွားတာကြောင့် ဈေးကျလာပေမယ့် အရောင်းအဝယ်တော့ နေ့စဉ် ပုံမှန်ဖြစ်ခဲ့ကြောင်း သိရပါတယ်။ အရောင်းအဝယ်အနေနဲ့ တစ်ပိသာ ၇၃၆ ကျပ်(တစ်တန်ကို ၄၅၀၁၀၆ ကျပ်)ဈေးနဲ့ တစ်ရက်ကို အိတ် ၈၀၀ မှ ၁၀၀၀ ကြားအရောင်းအဝယ်ဖြစ်ခဲ့ကြောင်း မြို့ခံကုန် သည်တစ်ဦးက ဆိုပါတယ်။
မန္တလေးဈေးကွက်မှာ ဒီတစ်ပတ် ပဲတီစိမ်းကြီးကို တရုတ်အဆွဲ ပုံမှန်ရှိပေမယ့် မြို့ခံပဲခွဲစက်တွေနဲ့ ပဲသန့်စင်စက်တွေက အဝယ်ပါး နေတယ်လို့ ပွဲရုံရပ်ကွက်ကဆိုပါတယ်။ ပဲကို တရုတ်ဝယ်လက်က အရည်အသွေးပေါ်မူတည်ပြီး ဝယ်အားပုံမှန်ရှိလို့ ဈေးအနည်းငယ် တက်လာတာလို့ မြို့ခံကုန်သည်တစ်ဦးကဆိုပါတယ်။ အရောင်းအဝယ် အနေနဲ့ တစ်ပိဿာ ၁၃၅၁ ကျပ်(တစ်တန်ကို ၈၂၇၃၃၈ ကျပ်)ဈေးနဲ့ တစ်ရက်ကိုအိတ် ၈၀၀ မှ ၁၀၀၀ ကြားဖြစ်ခဲ့တယ်လို့ သိရပါတယ်။ ပဲစင်းငုံနီအနေနဲ့ ဒီတစ်ပတ်မှာ အိန္ဒိယအတွက်ဝယ်ယူနေတဲ့ ရန်ကုန် ဝယ်လက်က ဝယ်လိုအားအေးသွားတာကြောင့် ယခင်အပတ်နဲ့စာရင် ဈေးကကျရိပ်သမ်းနေကြောင်း သိရပါတယ်။ အရောင်းအဝယ်အနေနဲ့ တစ်ပိဿာ ၈၅၀ ကျပ်(တစ်တန်ကို ၅၂၀၅၃၁ ကျပ်)ဈေးနဲ့ တစ်ရက် ကိုအိတ် ၆၀၀ ခန့်သာဖြစ်ခဲ့ကြောင်း သိရပါတယ်။ မတ်ပဲအနေနဲ့က ရန်ကုန်အဆွဲပါးပြီး မြို့ခံပဲခွဲစက်တွေကလည်း ဝယ်လိုအားလျော့သွား တာကြောင့် ယခင်အပတ်နဲ့စာရင် ဈေးကျလာပြီး တစ်ပိဿာကို ၆၆၇ ကျပ်(တစ်တန်ကို ၄၀၈၄၆၄ ကျပ်)ဈေးနဲ့ တစ်ရက်ကိုအိတ် ၅၀၀ ခန့်သာအရောင်းအဝယ်ဖြစ်ခဲ့ကြောင်း သိရပါတယ်။
ပခုက္ကူဈေးကွက်မှာ ဒီတစ်ပတ်ပဲတီစိမ်းသေး အရောင်းအဝယ် အေးပြီး ပဲစင်းငုံနီကိုတော့ ရန်ကုန်ဝယ်လက်က အောက်ဈေးနဲ့ အဝယ် အထိုက်အလျောက်ရှိခဲ့တယ်လို့ဆိုပါတယ်။ ပဲစင်းငုံနီကို လှောင်လက် တချို့က ဈေး ကောင်းရမယ်အထင်နဲ့ ဝယ်ယူသိုလှောင်ထားရာမှ အိန္ဒိယဘက်က ဝယ်လိုအားဆက်တိုက်အေးတာကြောင့် ပဲဈေးတွေ တောက်လျောက် ဈေးကျဆင်းနေတယ်လို့ မြို့ခံကုန်သည်တစ်ဦးက ဆိုပါတယ်။ အရောင်းအဝယ်အနေနဲ့ တစ်ပိဿာ ၈၅၅ ကျပ်(တစ်တန်ကို ၅၂၃၅၉၃ ကျပ်)ဈေးနဲ့ တစ်ပတ်လုံးမှ အိတ် ၁၈၀၀ ခန့်သာဖြစ်ခဲ့ကြောင်း သိရပါတယ်။
အောင်လံဈေးကွက်မှာဒီတစ်ပတ်အောင်လံအနီးတစ်ဝိုက် ဒေသများမှ ပဲတီစိမ်းတွေ ဈေးကွက်ထဲဝင်ရောက်မှုတိုးလာသလို အိတ်စပို့ အတွက် ဝယ်ယူနေတဲ့ ရန်ကုန်-မန္တလေးဝယ်လက်ကလည်း အရည်အသွေးပေါ်မူတည်ပြီးဈေးပေးအဝယ်ရှိနေတယ်လို့ပွဲရုံ ရပ်ကွက်ကဆိုပါတယ်။ဈေးကွက်စဖွင့်ချိန်မှာပဲအဝင်များပေမယ့်ဒီရက် ပိုင်းမိုးရွာသွန်းမှုကြောင့်နောက်ပိုင်းရက်တွေမှာအဝင်လျော့လာတယ်။ ဒါပေမယ့် ဝယ်လက်တွေကတော့ ပဲရဲ့ အရည်အသွေးအလိုက်သူ့ ဈေးနဲ့ သူ အဝယ်ရှိနေလို့ နေ့တိုင်းအရောင်းအဝယ်ဖြစ်နေတယ်လို့ သိရပါတယ်။ အရောင်းအဝယ်အနေနဲ့ တစ်ပိဿာ ၁၁၃၂ ကျပ်(တစ် တန်ကို ၆၉၃၂၂၅ ကျပ်)ဈေးနဲ့ တစ်ရက်ကိုအိတ် ၈၀၀ မှ ၁၀၀၀ ကြားဖြစ်ခဲ့တယ်လို့ ပဲကုန်သည်တစ်ဦးက ဆိုပါတယ်။
ပြည်ဈေးကွက်မှာ ဒီတစ်ပတ်ပဲတီစိမ်းအသစ်တွေပြည်အနီးတစ် ဝိုက်မှ ဝင်ရောက်မှုတွေရှိသလို မန္တလေးဝယ်လက်ကလည်း ပဲထွက် ရှိတဲ့ မြို့တွေရဲ့ ပဲအရည်အသွေးအလိုက် ဈေးပေးအဝယ်ရှိနေတယ်လို့ သိရပါတယ်။ အရောင်းအဝယ်အနေနဲ့ တစ်ပိဿာ ၁၀၂၅ ကျပ် (တစ်တန်ကို ၆၂၇၆၉၉ ကျပ်)ဈေးနဲ့ တစ်ရက်ကိုအိတ် ၂၀၀ မှ ၃၀၀ ကြားအရောင်းအဝယ်ဖြစ်ခဲ့တယ်လို့ ဆိုပါတယ်။ ပဲစင်းငုံနီအနေနဲ့ လှောင်လက်တွေထံမှာ ပစ္စည်းလက်ကျန်အထိုက်အလျောက်ရှိပေမယ့် အိတ်စပို့အတွက် ဝယ်ယူနေတဲ့ ရန်ကုန်ဝယ်လက်အဝယ်အေးတာ ကြောင့် ဈေးကျလာပြီး တစ်ပိဿာကို ၈၅၀ ကျပ်(တစ်တန်ကို ၅၂၀၅၃၁ ကျပ်)ဈေးနဲ့ တစ်ပတ်လုံးမှ အိတ် ၁၀၀၀ သာအရောင်း အဝယ်ဖြစ်ခဲ့တယ်လို့ ဆိုပါတယ်။ ကုလားပဲ(ထိုင်ဝမ်)က ဈေးကွက်သို့ ဝင်ရောက်မှုနည်းပေမယ့် ဒေသတွင်းပဲခွဲစက်တွေကတော့ တစ်ပိဿာ ကို ၈၈၀ ကျပ်(တစ်တန်ကို ၅၃၈၉၀၃ ကျပ်)ဈေးနဲ့ တစ်ပတ်အတွင်း အိတ် ၁၂၀၀ ခန့်အဝယ်ရှိခဲ့တယ်လို့ သိရပါတယ်။
တောင်ကြီးဈေးကွက်မှာ ဒီတစ်ပတ်ရေသွင်းပြောင်းသစ်တွေ ဈေးကွက်ထဲ စတင်ဝင်ရောက်နေပြီး တစ်ပိဿာကို ၄၅၀ ကျပ်ဈေး နဲ့ဈေးဖွင့်အရောင်းရှိပေမယ့်မိုးဆက်တိုက်ရွာသွန်းမှုကြောင့်အစိုဓာတ် ရှိနေလို့ အရောင်းအဝယ်မဖြစ်သေးဘူးလို့ ဈေးကွက်အတွင်းမှသိရ ပါတယ်။ ဒီရက်ပိုင်းမှာ လတ်တလောအရောင်းအဝယ်ဖြစ်နေတာက လက်ကျန်ပြောင်းတွေဖြစ်ပြီး ယင်းပြောင်းတွေကို ရန်ကုန်-မန္တလေး ဝယ်လက်နဲ့ ဒေသတွင်းအစာစပ်သမားများက ဝယ်အားပုံမှန်ရှိခဲ့ တယ်လို့ ဒေသခံပြောင်းကုန်သည်တစ်ဦးက ဆိုပါတယ်။ အရောင်း အဝယ်အနေနဲ့ တစ်ပိဿာ ၄၉၀ ကျပ်ဈေးနဲ့ တစ်ပတ်အတွင်းပိဿာ ချိန် ၂၅၀၀၀၀ ခန့်ဖြစ်ခဲ့ကြောင်း သိရပါတယ်။
လားရှိုးဈေးကွက်မှာ ဒီတစ်ပတ်ပြောင်းကို တရုတ်ဝယ်လက်နဲ့ ဒေသတွင်းအစာစပ်လုပ်ငန်းရှင်တွေ ဝယ်အားပုံမှန်ရှိပေမယ့် လှောင် လက်ကုန်သည်တွေထံမှာ ပစ္စည်းလက်ကျန်နည်းသွားပြီလို့ ဒေသခံ ပြောင်းကုန်သည်တစ်ဦးက ဆိုပါတယ်။ အရောင်းအဝယ်အနေနဲ့ တစ်ပိဿာ ၄၅၀ ကျပ်ဈေးနဲ့ တစ်ပတ်အတွင်း ပိဿာချိန် ၇၀၀၀၀ ခန့်သာဖြစ်ခဲ့ကြောင်း သိရပါတယ်။
မူဆယ်ဈေးကွက်မှာဈေးကွက်မှာ လှောင်လက်ကုန်သည်တွေ ဆီမှာပြောင်းလက်ကျန်လျော့နည်းပေမယ့် တရုတ်ဝယ်လက်တွေ ကတော့ ဝယ်အားပုံမှန်ရှိလို့ နေ့စဉ်ပြောင်းအရောင်းအဝယ် ဖြစ်နေ တယ်လို့ ဆိုပါတယ်။ အရောင်းအဝယ်အနေနဲ့ တစ်ပတ်အတွင်း မက်တန် ၈၀၀၀ ခန့်ဖြစ်ခဲ့ကြောင်း သိရပါတယ်။
မုံရွာဈေးကွက်မှာ ဒီတစ်ပတ်ပဲတီစိမ်းအနေနဲ့ ဈေးကွက်သို့ အ ဝင်လျော့သွားပေမယ့် တရုတ်အတွက်ဝယ်ယူနေတဲ့ မန္တလေးဝယ် လက်က အရည်အသွေးပေါ်မူတည်ပြီး ဈေးပေးအဝယ်ရှိတာကြောင့် ယခင်အပတ်နဲ့စာရင် ဈေးအနည်းငယ်မြင့်လာပြီး တစ်ပိဿာကို ၁၂၆၃ ကျပ်(တစ်တန်ကို ၇၇၃၄၄၈ ကျပ်)ဈေးနဲ့ တစ်ရက်ကို အိတ် ၈၀၀ ခန့်အရောင်းအဝယ်ဖြစ်ခဲ့ကြောင်း သိရပါတယ်။ ပဲစင်းငုံနီအနေ နဲ့ အိတ်စပို့အဆွဲမရှိလို့ ရန်ကုန်ဝယ်လက်အနေနဲ့ အဝယ်တုံ့ဆိုင်း နေတာကြောင့် ဈေးတွေဆက်တိုက်ကျဆင်းလာတယ်လို့ မြို့ခံကုန် သည်တစ်ဦးကဆိုပါတယ်။ အရောင်းအဝယ်အနေနဲ့ တစ်ပိဿာကို ၈၆၀ ကျပ်(တစ်တန်ကို ၅၂၆၆၅၅ ကျပ်)ဈေးနဲ့ တစ်ရက်ကိုအိတ် ၃၀၀ ခန့်သာဖြစ်ခဲ့ကြောင်း သိရပါတယ်။ ကုလားပဲဖြူလုံးကြီးနဲ့ ကု လားပဲ(ထိုင်ဝမ်)ကို အိတ်စပို့အဆွဲအေးသလို ဒေသတွင်းပဲခွဲစက်သ မားတွေလည်း သူတို့ရဲ့ စက်လည်ပတ်မှုပမာဏလောက်သာ အဝယ် ရှိလို့ ယခင်အပတ်နဲ့စာရင် ဈေးတန့်နေသလို အရောင်းအဝယ်ဖြစ်မှု ပမာဏတွေလည်း ကျဆင်းခဲ့တယ်လို့ ပွဲရုံရပ်ကွက်ကဆိုပါတယ်။ အရောင်းအဝယ်ဖြစ်မှုက ကုလားပဲဖြူလုံးကြီးတစ်ပိဿာ ၈၇၄ ကျပ် (တစ်တန်ကို ၅၃၅၂၂၈ ကျပ်)ကုလားပဲ(ထိုင်ဝမ်)တစ်ပိဿာ ၈၆၈ ကျပ်(တစ်တန်ကို ၅၃၁၅၅၄ ကျပ်)ဈေးနဲ့ နှစ်မျိုးပေါင်း တစ်ရက်ကို အိတ် ၄၀၀ ခန့်သာဖြစ်ခဲ့ကြောင်း သိရပါတယ်။
မကွေးဈေးကွက်မှာ ဒီတစ်ပတ်ပဲတီစိမ်းကို ရန်ကုန်-မန္တလေး ဝယ်လက်က အရည်အသွေးအလိုက်ဝယ်အားရှိနေတယ်လို့ ဆိုပါ တယ်။တချို့ကုန်သည်တွေကလည်းကြိုက်ဈေးမရလို့ အရောင်းနည်း နေသလို ဝယ်လက် တွေကလည်း အရည်အသွေး ကောင်းတွေကိုပဲ ဈေးပေးအဝယ်ရှိတာကြောင့် အရောင်းအဝယ်ဖြစ်မှုပမာဏတွေနည်း နေတယ်လို့ ဈေးကွက်အတွင်းမှသိရပါတယ်။ အရောင်းအဝယ် အနေနဲ့ တစ်ပိဿာ ၁၁၈၅ ကျပ်(တစ်တန်ကို ၇၂၅၆၈၂ ကျပ်)ဈေးနဲ့ တစ်ရက်ကိုအိတ် ၂၀၀ ခန့်သာဖြစ်ခဲ့ကြောင်း သိရပါတယ်။ ပဲစင်းငုံနီကိုတော့ ရန်ကုန်အဆွဲအေးနေလို့ ဈေးဆက်လက်ကျဆင်း ပြီး အရောင်းအဝယ်လည်းပါးခဲ့ကြောင်း သိရပါတယ်။ နှမ်းမျိုးစုံ ကတော့ ဈေးကွက်ထဲစတင်ဝင်ရောက်နေပြီး ရန်ကုန်-မန္တလေးဝယ် လက်နဲ့ ဒေသတွင်းဆီစက်တွေ ကလည်း ဝယ်အားပုံမှန်ရှိခဲ့တယ်လို့ နှမ်းကုန်သည်တစ်ဦးကဆိုပါတယ်။ အရောင်းအဝယ်အနေနဲ့ နှမ်းနီတစ်ပိဿာ ၂၂၉၀ ကျပ်၊ နှမ်းဖြူတစ်ပိဿာ ၂၈၇၅ ကျပ်၊ နှမ်းနက်စမုံတစ်ပိဿာ ၃၀၂၅ ကျပ်၊ နှမ်းညိုကြား တစ်ပိဿာ ၂၀၀၀ ကျပ်ဈေးနဲ့ နှမ်းမျိုးစုံတစ်ရက်ကို အိတ် ၂၅၀၀ ခန့်ဖြစ်ခဲ့ကြောင်း သိရပါတယ်။