မြိတ်ကျွန်းစုရှိ ငါးသယံဇာတများ ထိန်းသိမ်းမည်               တနင်္သာရီတိုင်း ဒေသကြီးအတွင်း မြိတ်ကျွန်းစုရှိ ငါးသယံဇာတများကို ထိန်းသိမ်းမည်ဖြစ်ကြောင်း ဇန်နဝါရီလ ၂၅ ရက်နေ့က မြန်မာနိုင်ငံ ငါးလုပ်ငန်းအဖွဲ့ချုပ်၌ အပတ်စဉ်ပြုလုပ်သည့် သားငါးကဏ္ဍဖွံ့ဖြိုးတိုး တက်မှုဆိုင်ရာ ဆွေးနွေးပွဲက သိရပါတယ်။             ''အရင်အပတ်က ဘင်္ဂလားပင်လယ်အော်ဒေသအတွင်း ရာသီဥတုပြောင်းလဲခြင်း၊ ဂေဟစနစ် ထိန်းသိမ်းခြင်း၊ ရင်းနှီး မြူပ်နံှခြင်းစသည်များ တိုးမြှင့်ဆောင်ရွက်ရန် ကိစ္စနှင့်ပတ်သက်၍ ညှိနှိုင်းဆွေးနွေးရန် အတွက် ထိုင်းနိုင်ငံ ဖူးခက်မြို့ကို ငါးလုပ်ငန်းဦးစီးဌာနက ၁ဝ ဦးတက်ရောက်ခဲ့ပါတယ်။ ဆွေးနွေးပွဲကိုတက်ရောက်တဲ့ ကိုယ်စားလှယ်ပေါင်း ၄၅ ဦးရှိပြီး အုပ်စု ၃ စုခွဲ၍ လေ့လာဆွေးနွေးမှုတွေ ပြုလုပ်ခဲ့ပါတယ်။ ဘင်္ဂလားပင်လယ် အော်ကိစ္စနှင့်ပတ်သက်ပြီး မြန်မာနိုင်ငံဘက်ကNational Coordanitor ခန့်အပ်ပြီးဖြစ်ပါတယ်။ ငွေကြေးအခက်အခဲကြောင့် စီမံကိန်းငယ်တွေကစပြီး ဆောင်ရွက်မှာပါ။ဒါ့ကြောင့် မြိတ်ကျွန်းစုထဲမှာရှိတဲ့ ငါးသယံဇာတတွေကို ထိန်းသိမ်းဖို့ ဦးစားပေး လုပ်ငန်းအဖြစ် ဆောင်ရွက်မှာဖြစ်ပါတယ်''ဟု ငါးလုပ်ငန်း ဦးစီးဌာနက တာဝန်ရှိသူတစ်ဦးက ပြောကြားပါတယ်။          ထိုင်းနိုင်ငံ ဖူးခက်ဒေသမှ ကျူနာငါးများကို မက်ထရစ်တန် ၁၇ဝဝဝ ကို နှစ်စဉ်ဂျပန်နိုင်ငံသို့ တင်ပို့လျက် ရှိနေကြောင်း အဆိုပါပုဂ္ဂိုလ်က ထပ်လောင်းပြောကြားပါတယ်။ MN 

ရေချိုပုစွန်ကို သီးသန့်လျာထားချက်ဖြင့် တင်ပို့နိုင်ရန် ပြင်ဆင်              ၂ဝဝ၈ ခုနှစ်နောက်ပိုင်း မွေးမြူထုတ်လုပ်မှုနည်းပါးခဲ့သော ရေချိုပုစွန်ကို ယခုအခါ သီးသန့်လျာထားချက်ဖြင့် ပြည်ပ နိုင်ငံများသို့ တင်ပို့ရောင်းချနိုင်ရန် ပြင်ဆင်နေပြီဖြစ်သည်။              ''ပုဂ္ဂလိက လုပ်ငန်းရှင်တွေကနေ ဧရာဝတီတိုင်းဒေသကြီး ညောင်တုန်းဘက်မှာ ကန်တွေ ပြင်နေပါပြီ၊ ဧက ၄ဝဝဝ လောက် ရှိမယ်၊ မကြာခင်မှာပဲ သားပေါက်တွေ ထည့်သွင်းမွေးကြမှာပါ။ ရေချိုပုစွန်က ပြည်တွင်း ဈေးကွက်ရော၊ ပြည်ပ ဈေးကွက်ပါ တွက်ခြေကိုက်လာတာလဲပါတယ်။ ရေချိုပုစွန်ကို အောင်မြင်စွာ မွေးမြူ ထုတ်လုပ်နိုင်တဲ့အတွက် သားပေါက်စခန်း ၁၆ ခုလောက်ရှိခဲ့ပါတယ်။ နောက်ပိုင်းမှာ ရေခိုျပုစွန်ဈေးကွက်က မရှိသလောက်ဖြစ်လာတဲ့ အတွက် သားပေါက်စခန်းတွေက ထုတ်လုပ်မှု ရပ်ခဲ့တာပါ။ နောက်ရေချိုပုစွန်ရဲ့ အားသာချက်က သီးခြားပဲမွေးမွေး၊ ငါးနဲ့ပဲတွဲမွေးမွေး မွေးလို့ရတယ်။ ငါးနဲ့ တွဲမွေးရင် အစာစရိတ်ရယ် ထုတ်လုပ်မှုစရိတ်ရယ်ကို လျှော့ချနိုင်တယ်''ဟု ပုစွန်လုပ်ငန်းရှင်များအသင်းက ဦးနှင်းဦးက ပြောပြသည်။ အဆိုပါ ရေချိုပုစွန်ကို ရှမ်းပြည်နယ်တောင်ပိုင်း ဒေသများတွင်လည်း အောင်မြင်စွာမွေးမြူနိုင်ခဲ့ကြောင်း သိရသည်။ MN

 ငါးမြစ်ချင်းမွေးမြူသူများ ထုတ်လုပ်မှုစရိတ် အနည်းဆုံးဖြစ်အောင် စီစဉ်ရန်လို                ရေချိုငါးများတွင် အဓိက ပါဝင်နေသည့် ငါးမြစ်ချင်းကို မွေးမြူသူများအနေဖြင့် ထုတ်လုပ်မှု စရိတ်ကို အနည်းဆုံး ဖြစ်အောင် လျော့ချဆောင်ရွက်ရန် လိုအပ်ကြောင်း ရေခိုျ ငါးမွေးမြူသူများ အသင်းက သိရသည်။ '' ထိုင်းနဲ့အိန္ဒိယကလည်း ငါးမြစ်ချင်းကိုမွေးပြီး၊ ကမ္ဘာ့ ငါးမြစ် ချင်းဈေးကွက်ကို တင်လာတာ တွေ့ရ တယ်။ အိန္ဒိယကအရင်က ငါးမြစ်ချင်း တင်ပို့ရောင်းချမှုကို ပြည်တွင်းစားသုံးမှု မလုံလောက်တဲ့အတွက် ခွင့်ပြုမှု မရှိခဲ့ ဘူး။ အခုခွင့်ပြုတာ တွေ့ရတယ်။ အိန္ဒိယ ငါးမြစ်ချင်းက အကောင်ကြီး တယ်။ အရောင်ပိုလှတယ်။ ထိုင်း ငါး မြစ်ချင်းက အကောင်သေးတယ်။ အရသာ မကောင်းဘူး၊ မြန်မာ့ငါး မြစ်ချင်းက အရသာကောင်းတယ်။ အရောင်အသွေး အနေနဲ့ ထပ်လုပ်ဖို့ လိုပါသေးတယ်။ ကြာလာရင် ဈေး ကွက်ဝေစုကို တဖြည်းဖြည်း ဖဲ့ယူ သွားနိုင်ပါတယ်။ ဒါ့ကြောင့် မြန်မာ မွေးမြူသူတွေအနေနဲ့ ငါးမြစ်ချင်း မွေးရာမှာ ထုတ်လုပ်မှုစရိတ်ကို အနည်း ဆုံး ဖြစ်အောင်စီမံနိုင် ပါမှ ရေရှည် ဈေးကွက်မှာ ယှဉ်ပြိုင်နိုင်မှာပါ'' ဟု ယင်းအသင်းက ဥက္ကဌဦးသန်းလွင်က ပြောကြား သည်။                 ယခုအခါ မြန်မာငါးမြစ်ချင်း များကို အရွယ်အစားကြီးပြီး အရောင် ကောင်းမွန်စေမည့် မျိုးမြှင့် တင်မှုကိုပုဂ္ဂလိက သားပေါက်စခန်း ၃ ခု က စီစဉ် ဆောင်ရွက်နေပြီဟု ဆိုသည်။                                                   ခင်မျိုးသွယ်

 ရေထွက်ကုန်ပစ္စည်း တင်ပို့မှုက သန်း ၂၉ဝ ခန့်ရရှိ                     မြန်မာနိုင်ငံက ဖမ်းဆီးမွေးမြူထုတ်လုပ်သည့် ရေထွက်ကုန်များကို ပြည်ပနိုင်ငံများသို့ တင်ပို့ရောင်းချ လျက်ရှိရာ ဒီဇင်ဘာလကုန်အထိ ဒေါ်လာသန်း ၂၉ဝ ခန့် ရရှိထားပြီးဖြစ်ကြောင်းသိရသည်။ '' ရေထွက်ကုန်ပစ္စည်းတွေကို ပင်လယ်ရေကြောင်းကနေတင်ပို့တာ ဒေါ်လာ ၂၆ဝ ခန့်နယ်စပ်ကုန်သွယ် ရေးစခန်း တွေဖြစ်တဲ့ မူဆယ်က ဒေါ်လာ ၅၄ သန်းခန့် ၊ မြဝတီကဒေါ်လာ၅ သန်းခန့်၊ ကော့သောင်းက ဒေါ်လာ ၁၆ သန်းခန့်၊ စစ်တွေကဒေါ်လာ ၆ သန်းခန့်၊ မြိတ်က ဒေါ်လာ ၇၁ သန်းခန့် ၊ မောင်တောက ဒေါ်လာ ၃ သန်းကျော်၊ တမူးက ဒေါ်လာ ဝ ဒသမ ဝ၁၃ သန်းခန့် စုစုပေါင်းဒေါ်လာ သန်း ၂၉ဝ ခန့်ရရှိထားပါတယ်။ ရေထွက်ကုန်တွေအနက် ပင်လယ် ငါးမျိုးစုံ၊ ရေချိုမွေးမြူရေးငါး၊ ကဏန်း၊ ငါးရှဉ့်၊ ရေမှော်စတဲ့ပစ္စည်းတွေကို နိုင်ငံပေါင်း ၃၃ နိုင်ငံကို အဓိက တင်ပို့နေပါ'' ဟု မြန်မာနိုင်ငံငါးလုပ်ငန်းအဖွဲ့ချုပ်က တာဝန်ရှိသူတစ်ဦးကပြော ကြားသည်။ ယခုအခါရေထွက်ကုန်ပစ္စည်းများကိုပိုမိုတင်ပို့နိုင်ရန်အတွက် မွေးမြူရေးသမားများအနေဖြင့် စူတန်ငါး၊ အအေးပိုင်း ဒေသများတွင် မွေးမြူရသည့်ငါးများ၊ ပင်လယ်မျှော့နှင့် ခရုများကိုတိုးခဲျ့မွေးမြူလျက်ရှိသည်ဟုဆိုသည်။ ခင်မျိုးသွယ်