ရေထွက်ကုန်တင်ပို့မှုက ဒေါ်လာ ၅ဝ၆ သန်းကျော် ရရှိထားပြီးဖြစ်                  ရေထွက်ကုန်တင်ပို့မှုက ဒေါ်လာ ၅ဝ၆ သန်းကျော်ရရှိထားပြီးဖြစ်ကြောင်းငါးလုပ်ငန်းဦးစီးဌာနက သိရသည်။ '' မြန်မာနိုင်ငံကနေ ရေထွက်ကုန်တွေတင်ပို့တဲ့အခါ ပြည်ပဝင်ငွေ ဘယ်လောက်ရရှိအောင်လုပ်ဆောင် ရမယ်ဆိုတာကို မွေးမြူရေးနှင့်ရေလုပ်ငန်းဝန်ကြီးဌာနကနေ လျာထားသတ်မှတ်ပေးပါတယ်။ ၂ဝ၁ဝ-၂ဝ၁၁ ခုနှစ်အတွက် ရေထွက်ကုန် တင်ပို့မှုကနေ ဒေါ်လာ သန်း ၇ဝဝ ရရှိအောင်ဆောင်ရွက်လုပ်ကိုင်ကြဖို့လျာထားခဲ့ ပါတယ်။ ဘဏ္ဍာနှစ် ကုန်ခါနီး တစ်လကျော်အလိုခန့်မှာ ရရှိထားတဲ့ငွေဟာ ဒေါ်လာ ၅ဝ၆ သန်းကျော်ဖြစ်ပါတယ်။ အဲဒီငွေဟာ ဖေဖော်ဝါရီ ၂၇ ရက်နေ့အထိရရှိတဲ့ဝင်ငွေပါ '' ဟု ငါးလုပ်ငန်းဦးစီးဌာနက တာဝန်ရှိသူတစ်ဦးက ပြောကြားသည်။                      အဆိုပါဝင်ငွေများမှာ ပင်လယ်ရေကြောင်းကုန်သွယ်မှုက ဒေါ်လာ ၃၁၂ ဒသမ ၇၅ သန်းကိုလည်းကောင်း၊ နယ်စပ် ကုန်သွယ်ရေးစခန်းများဖြစ်သော မူဆယ်၊ မြဝတီ၊ ကော့သောင်း၊ စစ်တွေ၊ မြိတ်၊ မောင်တောနှင့် တမူး စသည့် စခန်းများက ဒေါ်လာ ၁၉၃ သန်းကျော်ဖိုးကို လည်းကောင်း ဆောင်ရွက်ထားခဲ့ခြင်း ဖြစ်သည်ဟု ဆိုသည်။ MN

ကဏန်းတင်ပို့မှုက ၉၂ ရာခိုင်နှုန်းကျော် အကောင်အထည် ဖော်ပြီးဖြစ်                   ရေထွက်ကုန်ပစ္စည်းများကို ပြည်ပနိုင်ငံများသို့တင်ပို့ရောင်းချရာတွင် ကဏန်းလုပ်ငန်းရှင်များ အသင်းအနေဖြင့် ဒေါ်လာ ၃၅ သန်း ပြည့်မီအောင် ဆောင်ရွက်ရန် လျာထားခဲရာ ယခုအခါ ၉၂ ရာခိုင်နှုန်းကျော် အကောင်အထည် ဖော်ပြီးဖြစ်ကြောင်းသိရသည်။                    '' မွေးမြူရေးနှင့် ရေလုပ်ငန်းဝန်ကြီးဌာနက အသင်းတွေ အလိုက်လည်း တင်ပို့မှုကိုလျာထားသတ်မှတ် ပေးခဲ့တာပါ။ ၂ဝ၁ဝ-၂ဝ၁၁ ဘဏ္ဍာနှစ်ထဲမှာ အလှမွေးတင်ပို့မှုကနေ ဒေါ်လာ ဝ ဒသမ ၃ဝဝ သန်း၊ ရေချိုငါး တင်ပို့မှုကနေ ဒေါ်လာ ၁၂၅ သန်း၊ ငါးရှဉ့်တင်ပို့မှုကနေ ဒေါ်လာ ၂၅ သန်းနဲ့ကဏန်းတင်ပို့မှုကနေ ဒေါ်လာ ၃၅ သန်း ရရှိမယ်လို့ လျာထား ချမှတ်ပေးခဲ့ပါတယ်။ အခုကဏန်းတင်ပို့မှုကနေ ဒေါ်လာ ၃၂ သန်း ကျော်ကို ဖေဖော်ဝါရီ ၂၇ ရက်နေ့အထိရရှိထားပါတယ်။ ဒါ့ကြောင့် လျာထားသတ်မှတ်ချက်ကို အကောင် အထည်ဖော်နိုင်မှုက ၉၂ ရာခိုင်နှုန်းရှိနေပါပြီ။ အသင်းအားလုံးထဲမှာ ကဏန်း လုပ်ငန်းရှင်များအသင်းက လျာထားချက်ကို အများဆုံးအကောင်အထည်ဖော်ထားနိုင်ပါပြီ ''ဟု ကဏန်းလုပ်ငန်းရှင် များအသင်းမှ ဦးနှင်းဦးက ပြောပြသည်။                      မြန်မာနိုင်ငံက ကဏန်းများကို မူဆယ်၊ မြဝတီ၊ မြိတ်နှင့် ကော့သောင်းနယ်စပ် ကုန်သွယ်ရေးစခန်းများက လည်း ကောင်း၊ လေကြောင်းလိုင်းတို့ကလည်းကောင်း ပြည်ပနိုင်ငံများသို့တင်ပို့လျက်ရှိသည်ဟုဆိုသည်။ MN

ကဏန်းဈေး ၁ တန်လျှင်ဒေါ်လာ ၆၇ဝဝ ဖြင့် စံချိန်ချိုးရရှိ                     တနင်္သာရီတိုင်းဒေသကြီး၊ ဧရာဝတီတိုင်းဒေသကြီးနှင့် ရခိုင်ပြည်နယ်တို့က ဖမ်းဆီးရရှိသည့် ကဏန်းများကို ပြည်ပနိုင်ငံများသို့ တင်ပို့ရောင်းချလျက်ရှိရာ ကဏန်း ၁ တန်လျှင် ဒေါ်လာ ၆ဝဝဝ ဈေးနှုန်းရရှိကာ စံချိန်ချိုးရရှိခဲ့ ကြောင်း ကဏန်းတင်ပို့သူများထံက သိရသည်။                     ''ကဏန်းက ရေထရက်-ရေသေရက်တွေ အလိုက် ဖမ်းဆီးရရှိမှုက ကွာခြားတယ်၊ ရေသေရက် ဆို ကဏန်းက နည်းနည်းပဲရတတ်တယ်။ရေထရက် ဆိုရင်တော့ များများစားစားဖမ်းမိတယ်။ဖေဖော်ဝါရီလ ၁၈-၁၉ ရက် တွေက၊ ရေသေရက်တွေဆိုတော့ ဒီနေ့ဆို (ဖေဖော်ဝါရီ ၁၉) မန္တလေးကနေ မူဆယ်နယ်စပ် ကုန်သွယ်ရေးဇုန်ကို ကဏန်းကား ၂ စီး၊ချင်းရွှေဟော်နယ်စပ်ကုန်သွယ်ရေးစခန်းကို ကဏန်း ကား၂ စီး၊ စုစုပေါင်း ကား ၄ စီးပဲတက်နိုင်တယ်။ ဒီနှစ်က ကဏန်းဈေးအကောင်းဆုံးရတဲ့နှစ်ပါ'' ဟု မူဆယ် အခြေစိုက်ကဏန်း တင်ပို့သူလုပ်ငန်းရှင်တစ်ဦး ကပြော ကြားသည်။                     ကဏန်းဈေးနှုန်းများအနက် ၂ဝဝ၉-၂ဝ၁ဝ က ကဏန်း ၁ တန်လျှင် ဒေါ်လာ ၅၅ဝဝ ကျော်ရှိခဲ့ပြီး၊ ၂ဝဝ၈- ၂ဝဝ၉  ခုနှစ်က ကဏန်း ၁ တန်လျှင် ဒေါ်လာ ၄ဝဝဝ ဝန်းကျင်ဖြင့် အမြင့်ဆုံးဈေးနှုန်းများဖြစ်ပေါ်ခဲ့ရာ ယခုနှစ် ရရှိသည့် ကဏန်းဈေးနှုန်းမှာ စံချိန်ချိုးရရှိခဲ့ခြင်းဖြစ်သည်ဟု ဆိုသည်။                                                      MN

ရခိုင်ပြည်နယ်အတွင်း ပုစွန်သားဖေါက်စခန်းများ ဖွင့်လှစ်ထုတ်လုပ်မည်                  ပုစွန်များကို ပြည်ပပို့ကုန် ဝင်ငွေရရှိမှု လျာထား သတ်မှတ် တင်ပို့နိုင်ရန်အတွက် ရခိုင်ပြည်နယ်အတွင်း ပုစွန် သားဖေါက်စခန်းများ ဖွင့်လှစ်ထုတ်လုပ်သွားမည်ဖြစ်ကြောင်း ငါးလုပ်ငန်းဦးစီးဌာနက သိရသည်။ ''ရခိုင်ပြည်နယ်အတွင်းမှာ ပုစွန် သားဖေါက်စခန်း လေးခုကိုလာမယ့် သားဖေါက်ရာသီအမီ ဖွင့်လှစ်သွားမှာပါ။ အဲဒီအတွက် မြန်မာနိုင်ငံ ငါးလုပ်ငန်းအဖွဲ့ချုပ်နဲ့ ရခိုင် ပြည်နယ် ငါးလုပ်ငန်းဦးစီးဌာနတို့ ပူးပေါင်း အကောင်အထည်ဖော်မှာ ဖြစ်ပါတယ်။ အဲ့ဒီလိုအကောင်အထည်ဖော်ရာကနေ ထွက်ရှိလာမဲ့ သားပေါက်တွေကို ပုဂ္ဂလိကပုစွန်မွေးမြူရေး လုပ်ငန်းရှင်တွေဆီ ဖြန့်ဖြူးရောင်းချပေးမှာပါ။ရခိုင်ပြည်နယ် အတွင်းမွေးမြူရေးပုစွန် ထုတ်လုပ်မုှုကိုကြည့်ရင် ၂ဝဝ၉-၂ဝ၁ဝ ဘဏ္ဍာနှစ်အတွင်းမှာ တိုးတက်မှုရှိခဲ့ပေမဲ့ ၂ဝ၁ဝ-၂ဝ၁၁ မှာ လျော့နည်းကျဆင်းခဲ့တာ တွေ့ရပါတယ်။ဒီနှစ်ထဲမှာ ပုစွန် မွေးမြူ ထုတ်လုပ်မှုကျဆင်းရတာဟာ ပုဂ္ဂလိကမွေးမြူသူ တွေ အနေနဲ့ ပုစွန်ကန်တွေမှာ သားပေါက် ထည့်မွေးချင်ပေမဲ့ အရည်အသွေးကောင်းတဲ့ သားပေါက်တွေ အလုံအလောက် မရရှိခဲ့လို့ ဖြစ်ခဲ့ရတယ်လို့ သိရပါတယ်'' ဟု မြန်မာနိုင်ငံ ပုစွန် လုပ်ငန်းရှင်များအသင်းက ဦးနှင်းဦးက ပြောပြသည်။ ရခိုင်ပြည်နယ်အတွင်း ပုစွန်သားဖေါက်စခန်း ဖွင့်လှစ်မည့် နေရာများမှာ ကျောက်ဖြူ-ပုစွန်သားဖေါက်စခန်း၊ စစ်တွေမြို့ရှိ ရေချမ်းပြင်သားဖေါက်စခန်း၊ စိုးမဲကျီသားဖေါက် စခန်းနှင့် မောင်တောရှိ အလယ်သံကျော် သားဖေါက်စခန်း တို့ ဖြစ်သည်။                        MN