ဒီသီတင်းပတ်ဖြစ်တဲ့ စက်တင်ဘာ ၂၅ ရက်မှ အောက်တိုဘာ ၁ ရက်နေ့တာ ကာလအတွင်း နနွင်း ၁၆ ဒသမ ၅ တန်ကို အိန္ဒိယနိုင်ငံကို တင်ပို့ခဲ့ပါတယ်။ ယခင်သီတင်းပတ် အပို့ပျောက်ခဲ့တဲ့ နနွင်းက ဒီတစ်ပတ်မှ ပြန်လည်တင်ပို့ခဲ့တာ ဖြစ်ပါတယ်။ တစ်တန်ကို အက်ဖ်အိုဘီဈေး ကန်ဒေါ်လာ ၁၅၅၀ ဝန်းကျင်နဲ့ တင်ပို့ခဲ့လို့ စုစုပေါင်းပို့ကုန်ဝင်ငွေ ကန်ဒေါ်လာ ၂၅၅၇၅ ရရှိခဲ့ပါတယ်။စက်တင်ဘာလအတွင်း နနွင်းကို မလေးရှား၊ စင်ကာပူ၊ အာရပ်စော်ဘွားများ ပြည်ထောင်စုနိုင်ငံနဲ့ အိန္ဒိယစတဲ့နိုင်ငံတွေကို နနွင်းတင်ပို့ခဲ့တာ စုစုပေါင်း တန်ချိန် ၇၉ ဒသမ ၅ တန်ရှိခဲ့ပါတယ်။ သို့ပေမဲ့ သြဂုတ်လရဲ့ နနွင်းတင်ပို့မှုမှာ စုစုပေါင်း တန်ချိန် ၁၂၈ ဒသမ ၅၇ တန်ရှိခဲ့တာကြောင့် စက်တင်ဘာလမှ နနွင်းအပို့လျော့ခဲ့တယ်လို့ ဆိုရပါမယ်။ MIRT(DOBT)

                      ရှမ်းချင်းတက်တွေကတော့ အောင်ပန်းဈေးကွက်မှာ အဝင်များနေပေမဲ့၊ ဟိုပုံး ဈေးကွက်မှာတော့ လက်ကျန်နည်းနေပြီဖြစ်တဲ့ ချင်း (ဥမ) တွေသာ လက်လီဈေးနဲ့ ရောင်းနေတယ်လို့သိရပါတယ်။ လက်လီဈေးက တစ်ပိဿာ ၄၀၀ ကျပ်ဈေးရှိပါတယ်။ ချင်းခြောက်ကတော့ တစ်ပိဿာကို ၂၁၅၀ ကျပ်၊ ၂၂၀၀ ကျပ်ဈေးရှိပေမဲ့ ရောင်းမယ့်သူကနည်းပါတယ်။ လှောင်လက်အချို့က ဈေးကြီးမိပြီး ဝယ်ထားရတာ ရယ်၊ လက်ကျန်လည်းနည်းနေပြီ ဖြစ်တာကြောင့် တစ်ပိဿာ ၂၅၀၀ ကျပ်ရမှ ရောင်းနိုင်မယ်လို့ဆိုပါတယ်။ အောင်ပန်းဈေးကွက်မှာတော့ ချင်း (စို) သစ်တွေက တော့ ပုံမှန်အဝင်ရှိနေပါတယ်။ သီတင်းကျွတ်နားနီးလာတာကြောင့် အလှူပွဲတွေမှာ ဧည့်ခံဖို့အတွက် ရန်ကုန်၊ မန္တလေး၊ ပြည်စတဲ့မြို့ကြီးတွေက အဝယ်များနေပါတယ်။ အဝယ်များလာလို့ ဈေးလည်းအနည်းငယ် တက်လာပြီး တစ်ပိဿာ ၃၀၀ ကျပ်ဈေး ရှိပါတယ်။ ချင်း (ဥမ) တွေကတော့ အဝင်လည်းမရှိသလောက်ဖြစ်နေ တာကြောင့် သူလည်းဈေးတက်လာပါတယ်။ လတ်စက တစ်ပိဿာ ၄၀၀ ကျပ်ရှိပြီး၊ ထိပ်စက၅၀၀ ကျပ်ဈေး ရှိပါတယ်။ ချင်းခြောက်ကတော့ တစ်ပိဿာ ၁၅၀၀ ကျပ်မှ ၂၀၀၀ ကျပ်ဈေးရှိပါတယ်။ ဒီတစ်လမှာတော့ ချင်း (စို)က ဝင်သလောက်ပြန်ရောင်း ထွက် နေတယ်လို့လည်းသိရပါတယ်။ ဧဧခိုင်

                    ကမ္ဘာ့ကောက်ပဲသီးနှံရောင်းချမှု ပိုမိုခြင်းနဲ့ ဝယ်လိုအားနည်းခြင်းတို့ကြောင့် ကမ္ဘာ့စားနပ်ရိက္ခာဈေးနှုန်းများ စက်တင်ဘာလအတွင်းမှာ ၂ ရာခိုင်နှုန်းကျဆင်း ခဲ့တယ်လို့ FAO  က အောက်တိုဘာ ၆ ရက်နေ့မှာပြောကြား ပါတယ်။ စားနပ်ရိက္ခာ ဈေးနှုန်းကျဆင်းမှုကြောင့် ငွေကြေးဖောင်းပွမှု သက်သာရာရရှိခဲ့တဲ့ အတွက် ဥရောပ ဗဟိုဘဏ်မှ အတိုးနှုန်းဆုံးဖြတ်ချက်အပေါ် စိုးရိမ်မှုများလည်း လျော့ကျလာတယ်လို့ ဆိုပါတယ်။                    အဓိကစားသောက်ကုန်များဖြစ်တဲ့ နှံစားသီးနှံ၊ ဆီထွက်သီးနှံ၊ အသားနဲ့ သကြားတို့ရဲ့ လစဉ်ဈေးနှုန်း အပြောင်းအလဲကိုတိုင်းတာတဲ့ FAO ရဲ့ စားနပ်ရိက္ခာ ဈေးနှုန်းညွှန်ကိန်းဟာ စက်တင်ဘာလမှာ ပျမ်းမျှ ၂၂၅ မှတ်ရှိလို့ သြဂုတ်လထက် ၄ ဒသမ ၅ မှတ်ကျဆင်းခဲ့တယ်လို့ FAO ကဆိုပါတယ်။ စက်တင်ဘာညွှန်းကိန်း က ဖေဖော်ဝါရီလအတွင်း အမြင့်ဆုံးဖြစ်ခဲ့တဲ့ ၂၃၈ မှတ်အောက် လျော့ကျခဲ့တယ်လို့ ဆိုပါတယ်။ ကုန်စည်ဈေးနှုန်းများဟာ ဆက်လက်ကျဆင်းမယ့် အလားအလာအရ နောက်လအနည်းငယ်အတွင်းမှာလည်း ကမ္ဘာ့စားနပ်ရိက္ခာ ဈေးနှုန်း ကျဆင်းမယ်လို့ FAO စီးပွားရေးပညာရှင်ကပြောကြားပါတယ်။ ကမ္ဘာ့စီးပွားရေးကျဆင်းနေခြင်းက ဝယ်လိုအားကို နည်းစေနိုင်တဲ့အပေါ် ရင်းနှီး မြုပ်နှံသူများ စိုးရိမ်လာကြပြီး စက်တင်လာလအတွင်း နိုင်ငံတကာ သီးနှံ ဈေးကွက်များမှာ ရောင်းထုတ်မှုတွေရှိလာခြင်းကလည်း လွန်ခဲ့တဲ့လများ အတွင်း စားနပ်ရိက္ခာဈေးနှုန်း ပိုမိုကျဆင်းဖို့ဖြစ်လာပါတယ်။ ၂၀၁၁ နှံစားသီးနှံထွက်ရှိမှုဟာ အစောပိုင်းခန့်မှန်းထားတဲ့ ပမာဏထက်တန်ချိန် ၃ သန်းပိုပြီး၊ တန်ချိန် ၂ ဒသမ ၃၁ ဘီလီယံ ထွက်ရှိမယ်လို့ တိုးမြင့်ခန့်မှန်းခဲ့ပါတယ်။ သီးနှံထုတ်လုပ်မှု တိုးတက်မယ့်မျှော်လင့်ချက်ရှိပေမဲ့ ကမ္ဘာ့စီးပွားရေးပြန် လည် တိုးတက်မှု နှေးကွေးနေခြင်းနဲ့ ငွေကြေးအကျပ်အတည်း တိုးပွားလာခြင်း ကြောင့် ကမ္ဘာ့စားနပ်ရိက္ခာဖူလုံမှုအပေါ် ထိခိုက်မှုနဲ့ပတ်သက်လို့တော့ မရေရာဘူး လို့ ရောမ အခြေစိုက် အေဂျင်စီမှပြောကြားပါတယ်။ စီးပွားရေးအခြေအနေ တိုးတက်မှု နှေးကွေးလာခြင်းက ဖွံ့ဖြိုးဆဲနိုင်ငံများမှာ အလုပ်လက်မဲ့ ပြဿနာ တိုးပွားလာပြီး၊ ဝင်ငွေနည်းပါးမှုတွေဖြစ်လာနိုင်တယ်လို့ဆိုပါတယ်။ လမင်း Source: Reuters

                         ပင်လယ်ရေကြောင်း ထောပတ်ပဲနဲ့ မြေထောက်ပဲတင်ပို့မှုမှာ ယခုတစ်ပတ်မှာလည်း ပမာဏများနေသေးတာ တွေ့ရပါတယ်။ လက်ကျန်နည်းနေပြီဖြစ်ပေမဲ့ စက်တင်ဘာနောက်ဆုံး သီတင်းပတ်မှာ ထောပတ်ပဲ တန် ၂၀၀ နဲ့ မြေထောက်ပဲ တန်ချိန် ၄၁၀ ကျော်ထိ တင်ပို့မှုရှိခဲ့တာ တွေ့ရပါတယ်။ စက်တင်ဘာလ တစ်လ လုံးအတွင်း တင်ပို့မှုအနေနဲ့ ထောပတ်ပဲတန်ချိန် ၆၆၃၊ မြေထောက်ပဲတန်ချိန် ၁၇၀၀ ကျော်ရှိပြီး သြဂုတ်လအတွင်းမှာ ထောပတ်ပဲတန်ချိန် ၇၀၀ ခန့်၊ မြေထောက်ပဲ တန်ချိန် ၈၀၀ ခန့် ရှိခဲ့တာတွေ့ရပါတယ်။                           ရန်ကုန် FOB ဈေးကွက်အရောင်းအဝယ်ဖြစ်မှုအနေနဲ့ အောက်တိုဘာလ ပထမပတ်အတွင်း ထောပတ်ပဲ တန်ချိန် ၁၄၀၊ မြေထောက်ပဲ တန်ချိန် ၄၃၀ ကျော် စာချုပ်ချုပ်ခဲ့တယ်လို့ သိရပါတယ်။ စက်တင်ဘာလ တစ်လလုံး FOB အရောင်းအဝယ်ဖြစ်မှုမှာ ထောပတ်ပဲတန်ချိန် ၂၉၀ သာရှိခဲ့ပြီး မြေထောက်ပဲတန်ချိန် ၂၇၀၀ ခန့်ရှိခဲ့ပါတယ်။ အောက်တိုဘာလ ၇ ရက်နေ့ FOB ဈေးအနေနဲ့ ထောပတ်ပဲ FAQ တစ်တန် ကန်ဒေါ်လာ ၇၃၀-၇၅၀ ရှိပြီး မြေထောက်ပဲ FAQ တစ်တန် ကန်ဒေါ်လာ ၇၄၀-၇၆၀ အသီးသီးရှိကြောင်း သိရပါတယ်။ MIRT_MAPT