Background
မြန်မာ-တရုတ်နယ်စပ်ရှိ လွယ်ဂျယ်မှ စက်တင်ဘာလ ၁၂ ရက်မှ ၁၈ ရက်ထိကာလအတွင်းမှာ ကန်ဒေါ်လာ သုညဒသမ ၀၉၅ သန်းတန်ဖိုးရှိတဲ့ ပြောင်း ဖူးစေ့ တန် ၂၅၀ ကိုအပို့ရှိခဲ့ပါတယ်။ မူဆယ်နယ်စပ်မှလည်း ကန်ဒေါ်လာ ၁ ဒသမ ၁၆၅ သန်းတန်ဖိုးရှိတဲ့ ပြောင်းဖူးစေ့ ၃၀၇၁ တန်အပို့ရှိခဲ့ရာ ယခုအပတ်မှာ နယ်စပ်မှပြောင်းဖူးစေ့ တန် ၃၃၂၁ တန်ကျော်အပို့ရှိခဲ့တာဖြစ်ပါတယ်။ ယခင်အပတ် မူဆယ်နဲ့ချင်းရွှေဟော်တို့မှ တင်ပို့ခဲ့ခြင်းထက် ယခုအပတ်မှာ ၂၉၈ တန်ကျော်အပို့ပို ခဲ့တယ်လို့ သိရပါတယ်။ မိမိဘက်ရောတစ်ဘက်နိုင်ငံမှာပါ မြေပြင်ပေါက်ဈေးများ အနည်းငယ်လျော့ နည်းလျက်ရှိပါတယ်။ ယခုအပတ်မိမိဘက်မြေပြင်ပေါက်ဈေးမှာ ၃၃၄၈၅၄ ကျပ်ဖြစ်ပြီး ယခင်အပတ်ထက် ၇၈၅၉ ကျပ် လျော့နည်းပြီး တစ်ဘက် နိုင်ငံရွှေလီဈေးမှာ ဒေါ်လာ ၄၀၀ ဖြစ်ပြီး ယခင်အပတ်ထက် ၂ ဒေါ်လာ လျော့နည်း ခဲ့ပါတယ်။ MIRT(DOBT)
ပင်လယ်ရေကြောင်းကုန်သွယ်မှုမှ ပြောင်းတန်ချိန် ၁၉၃ တန်၊ တန်ဖိုးကန် ဒေါ်လာ သုည ဒသမ ၂၇၀ သန်းဖိုးကို စက်တင်ဘာလ ၉ ရက်မှ ၁၅ ရက်ထိ ကာလအတွင်းမှာ တင်ပို့မှုရှိလာတာတွေ့ရပါတယ်။ ဗီယက်နမ် နိုင်ငံသို့ တန် ၁၅၀ နဲ့ စင်္ကာပူနိုင်ငံသို့ ၄၃ တန်တင်ပို့ခဲ့တာဖြစ်ပါတယ်။ သြဂုတ်လအတွင်းမှာ တန် ၂၄၀ အပို့ရှိခဲ့ပြီးစက်တင်ဘာ ၂ ရက်မှ ၈ ရက်ထိကာလမှာ အပို့နားခဲ့ပါတယ်။ ယခု အပတ်မှာပြန်လည်တင်ပို့လာတာ တွေ့ရပါတယ်။ သြဂုတ်လမှာ ဗီယက်နမ် သို့တန် ၁၅၀ နဲ့ စင်္ကာပူသို့ တန် ၉၀ တင်ပို့ခဲ့တယ်လို့သိရပါတယ်။ ပြောင်း FOB ရန်ကုန်ပေါက်ဈေးမှာ ဒေါ်လာ ၃၈၀ ဖြစ်ပါတယ်။ CMK
တမူးနယ်စပ်မှ စက်တင်ဘာ ၁၂ ရက်မှ ၁၈ ရက်ထိကာလအတွင်းမှာ ကန်ဒေါ်လာ သုည ဒသမ ၀၁၀ သန်း တန်ဖိုးရှိ ဂျုံစေ့ ၃၈ တန်ကျော် အသွင်း ရှိခဲ့ပါတယ်။ ယခင်အပတ်က အသွင်း မရှိခဲ့ဘဲ ယခုအပတ်တင်သွင်းမှု ပြန်ရှိ လာတာတွေ့ရပါတယ်။ စက်တင်ဘာ လ ပထမပတ်မှာတော့ ၇၈ တန်ခန့် အသွင်းရှိခဲ့ပြီး ဇူလိုင်နဲ့ သြဂုတ်လ ၂ လမှာတမူးနယ်စပ်မှ ဂျုံစေ့ တန် ၄၂၀၀ ကျော် တင်သွင်းထားပြီးဖြစ်ပါတယ်။ MIRT (DOBT)
နနွင်း ၂၆၈ တန်ကို စက်တင်ဘာ ၉ ရက်မှ ၁၅ ရက်အတွင်း ပင်လယ်ရေကြောင်း ကုန်သွယ်မှုလမ်းမှ ပြည်ပကို တင်ပို့ခဲ့ပါတယ်။ ၂၀၁၂ ခုနှစ် ဇန်နဝါရီလမှ စတင်ပြီး နနွင်းတင်ပို့မှုကိုကြည့်ရင် ဒီတစ်ပတ်တင်ပို့မှု တန်ချိန်က အများဆုံးဖြစ်ခဲ့ တယ်လို့ သိရပါတယ်။ တင်ပို့ခဲ့တဲ့နိုင်ငံနဲ့ တန်ချိန်က အိန္ဒိယနိုင်ငံကို ၃၃ တန်၊ မလေးရှားနိုင်ငံကို ၁၀၅ တန်၊ ပါကစ္စတန်နိုင်ငံကို ၅၅ တန်နဲ့ စင်ကာပူနိုင်ငံကို ၇၅ တန်အသီးသီးတင်ပို့ခဲ့ တာ တွေ့ရပါတယ်။ ယခင်တစ်ပတ်နနွင်းတင်ပို့မှုက တန်ခြောက်ဆယ် သာရှိခဲ့တာကြောင့် ဒီတစ်ပတ်မှာတန်ချိန် နှစ်ရာကျော်ပိုမို တင်ပို့နိုင်တာတွေ့ရပါတယ်။ FOB ဈေးက တစ်တန်ကို ကန်ဒေါ်လာ ၅၀၀-၅၅၀ ရရှိခဲ့တယ်လို့ သိရပါတယ်။ MIRT (DOT)
မြန်မာ-ဘင်္ဂလားဒေ့ရှ်နယ်စပ်ရှိ စစ်တွေနယ်စပ်မှ ကန်ဒေါ်လာ သုည ဒသမ ၀၀၁ သန်းတန်ဖိုးရှိ မန်ကျည်းစေ့ ၆၈ တန်ကို စက်တင်ဘာလ ၁၂ ရက်မှ ၁၈ ရက်ထိ ကာလအတွင်းမှာ အပို့ရှိခဲ့ပါတယ်။ ယခင်အပတ် များကအပို့မရှိဘဲ ယခု အပတ်မှာ အပို့ရှိလာတာဖြစ်ပါတယ်။ ပင်လယ်ဆားငန်ရေဒဏ်ခံနိုင်စွမ်းရည်ရှိသဖြင့် ဘိလပ်မြေနဲ့ရောပြီး ဆောက်လုပ်ရေးလုပ်ငန်းများမှာ အသုံးပြုတယ်လို့သိရပါတယ်။MIRT(DOBT)
ဒီတစ်ပတ်မှာလည်း ချင်း(ဥမ)က အဝင်နည်းလာပါတယ်။ အရင်လတွေက အောင်ပန်းဈေးကွက်မှာ ၅ ရက်တစ်ဈေးကို ပိဿာချိန်လေးထောင်၊ ငါးထောင်ခန့် အဝင်ရှိပေမယ့် ဒီတစ်လမှာတော့ နှစ်ထောင်၊ သုံးထောင်ခန့်သာအဝင်ရှိပါတော့ တယ်။ အခုချိန်က ချင်းတွေပုပ်တဲ့အချိန်ဖြစ်လာတာကြောင့်လို့လည်း ဆိုပါတယ်။ ဒါပေမယ့်လည်း ချင်း(ဥမ)ကအဝင်ရှိသလောက်၊ ပြန်ထွက်တယ်လို့ သိရပါတယ်။ အောက်တိုဘာလမှာ ချင်းအသစ် တွေ ပေါ်လာတော့မှာဖြစ်တာကြောင့် အဟောင်း တွေလည်း ဈေးကွက်မှာ သိပ်မကျန်တော့ပါ ဘူး။ အောင်ပန်း ဈေးကွက်မှာ ဒီတစ်ပတ်ချင်းဈေးက (အစို) ၁၆၀၀ ကျပ် - ၁၇၀၀ ကျပ်ရှိပြီး (အခြောက်)က ၁၃၀၀ ကျပ် - ၁၃၅၀ ကျပ် ရှိပါတယ်။
မြဝတီနဲ့မူဆယ်နယ်စပ်များမှ စက်တင်ဘာလ ၁၂ ရက်မှ ၁၈ ရက်ထိကာလ အတွင်းမှာကန်ဒေါ်လာသုည ဒသမ ၀၉၅ သန်းတန်ဖိုးရှိချင်းခြောက်များကို မြဝတီမှ ၃၆ တန်ကျော်နဲ့ မူဆယ်မှ ၆ တန်ခန့် အပို့ရှိခဲ့ပါတယ်။ယခင်အပတ်ကထက် နယ်စပ်မှ ချင်းခြောက် ၂၇ တန်ခန့်အပို့ပိုခဲ့တယ်လို့သိရပါတယ်။ MIRT(DOBT)
မန်းပဲဈေးကွက်မှာ အိန္ဒိယလိုင်းက ဝယ်ယူမှုရှိတဲ့ မတ်ပဲနဲ့ ပဲစင်းငုံနီများဟာ ဈေးငြိမ်သက်မှုရှိမနေဘဲ တစ်ရက်တည်းမှာ နံနက်ဈေး၊ ညနေဈေး အပြောင်းအလဲ အနည်းငယ်ရှိပြီး၊ ဈေးကစားလျက်ရှိကြောင်း သိရပါတယ်။ ယခုအပတ်မှာ မတ်ပဲ တစ်ပိဿာ ၇၆၇ ကျပ် မှ ၈၀၀ ကျပ်ကြား (တစ်တန် ၄၆၉၇၀၃ ကျပ်မှ ၄၈၉၉၁၂ ကျပ်ကြား) အရောင်းအဝယ်ဖြစ်လို့ ဈေးငြိမ်သက်မှုမရှိသလို ပဲစင်းငုံနီမှာလည်း တစ်ပိဿာ ၉၇၅ ကျပ်နဲ့ ၉၈၃ ကျပ်ကြား (တစ်တန် ၅၉၇၀၈၀ ကျပ်မှ ၆၀၁၉၇၉ ကျပ်ကြား)အရောင်းအဝယ်ဖြစ်လို့ ဈေးအနည်းငယ်ကစားကြောင်း သိရပါတယ်။ ယခင်အပတ်နဲ့ နှိုင်းယှဉ်ရင် အရောင်းအဝယ်ဖြစ်လာသော်လည်း ဈေးကစားနေမှု၊ ပစ္စည်းအရည် အသွေးနဲ့ ဝယ်လိုအားကြောင့် အရောင်းအဝယ်များပြုလုပ်ရာမှာ သတိထားပြီး၊ အရောင်းအဝယ် ပြုလုပ်ရလို့ အရောင်းအဝယ် သွက်လက်မှုမရှိ ကြောင်း၊ ကုန်ပစ္စည်းဈေးငြိမ်သက်မှုရှိနေပါက အရောင်းအဝယ်လည်း ပုံမှန်ဖြစ်နိုင် ကြောင်း ပဲကုန်သည်တစ်ဦးက ပြောပါတယ်။ ယခင်အပတ်က မတ်ပဲ တစ်ပိဿာ ၇၆၇ ကျပ်ဈေးနဲ့ နေ့စဉ် တန် ၃၀ မှ ၄၀ ခန့်အထိ အရောင်းအဝယ်ရှိခဲ့ပြီး၊ ယခုအပတ်မှာ နေ့စဉ် တန် ၅၀ ခန့် အရောင်းအဝယ်ရှိနေသလို ပဲစင်းငုံနီမှာ ယခင်အပတ် တန် ၆၀ မှ ၇၀ ခန့်ထိ အရောင်းအဝယ်ရှိခဲ့ပြီး၊ ယခုအပတ်မှာ နေ့စဉ် တန် ၈၀ မှ တန် ၁၀၀ ကြားအရောင်းအဝယ် ဖြစ်နေကြောင်း သိရပါတယ်။စိုးအောင်
ပြည်ပဲဈေးကွက်အတွင်း မတ်ပဲ၊ ပဲတီစိမ်း၊ ပဲစင်းငုံ၊ ကုလားပဲဈေးမှာ ယခင် တစ်ပတ်ထက်အေးနေပြီး၊ ပဲကြီးဈေးနှုန်းကတော့ ယခင်တစ်ပတ်အတိုင်း ဈေး အမြင့်မှာရှိနေခဲ့တာကိုတွေ့ရပါတယ်။ ယခုစက်တင်ဘာ တတိယပတ်မှာ မတ်ပဲသီးနှံ တချို့ တစ်ခါတစ် ရံနယ်စုံမှအနည်းငယ်ဝင်ရောက်လာပြီး၊ အိတ် ၁၅၀-၂၀၀ ခန့်ဝင် လာတယ်လို့သိရပါတယ်။ ပဲဈေးနှုန်းမှာတော့ တစ်တင်း ၁၆၃၀၀ ကျပ်နဲ့ ဈေးအေး နေခဲ့တာကိုတွေ့ရပါတယ်။ ရန်ကုန်ဝယ်လက်ကတော့ ရသလောက်အဝယ်ရှိနေ သော်လည်း ထုတ်ရောင်းသူနည်းနေတဲ့အတွက် ယခုတစ်ပတ် အတွင်း ရန်ကုန်ကို တစ်နေ့အိတ် ၁၀၀၀ ခန့်သာ တင်ပို့နိုင်ခဲ့တယ်လို့သိရပါတယ်။
မြန်မာ-တရုတ်နယ်စပ်ရှိ မူဆယ်နယ်စပ်ကုန်သွယ်ရေးမှ ကန်ဒေါ်လာ သုည ဒသမ ၇၆၈ သန်းတန်ဖိုးရှိ ပဲတီစိမ်းလုံးပြည့် ၈၉၁ တန်ခန့်ကို စက်တင်ဘာလ ၁၂ ရက်မှ ၁၈ ရက်ထိကာလအတွင်းမှာ အပို့ရှိခဲ့ရာ ယခင် အပတ်ကထက် ၃၆၃ တန် အပို့ပိုခဲ့ပါတယ်။ ပဲတီစိမ်းလုံးခြမ်းတင်ပို့မှုကတော့ ၁၂၁ တန်၊ တန်ဖိုးအားဖြင့် ကန်ဒေါ်လာ ၀ ဒသမ ၁၂၉ သန်းဖိုးဖြစ်ပြီး ယခင်အပတ်တင်ပို့မှုထက် ၃၂ တန်ခန့်အပို့လျော့နည်းခဲ့ပါတယ်။