Background
Scoot လို့ အမည်ပေးထားတဲ့ ခရီးဝေးတန်ဖိုးနည်း လေယာဉ် ခရီးစဉ်ကို တရားဝင်စတင်မယ်လို့ စင်ကာပူ လေကြောင်းလိုင်းက နိုဝင်ဘာ ၁ ရက်က ကြေညာပါတယ်။ လုပ်ငန်းသစ်ကို စင်ကာပူလေကြောင်း လိုင်းကသာ ပိုင်ဆိုင်ပြီး သူ့ရဲ့မိခင်ကုမ္ပဏီဆီကဝယ်ယူထားတဲ့ ဘိုရင်း B 777-200 လေယာဉ်တွေကို အသုံးပြုပြီး ၂၀၁၂ ခုနှစ်နှစ်လယ်က ခရီးစဉ်တွေ စတင်ပြေးဆွဲမယ်လို့ ပြောပါတယ်။ ပထမနှစ်အတွက် သတ်မှတ်ထားတဲ့ ခရီးစဉ်တွေက သြစတြေးလျ၊ တရုတ်နဲ့ အခြားနေရာတွေ ဖြစ်ပါတယ်။ ၂၀၁၆ ခုနှစ်မှာ လေယာဉ် ၁၄ စီးအထိတိုးချဲ့သွားမယ်လို့ ကုမ္ပဏီကပြောပါတယ်။ လက်ရှိအချိန်မှာ အာရှဒေသတန်ဖိုးနည်းလေယာဉ်ခရီးစဉ်တွေက ခရီးတိုတွေသာဖြစ်ပါတယ်။ မြို့ပြလေ ကြောင်းလုပ်ငန်းမှာ ထိပ်ဆုံး စာရင်းထဲမှာပါဝင်နေတဲ့ စင်ကာပူလေကြောင်းလိုင်းက တိုက်ဂါး အဲဝေး ဦးပိုင် ကုမ္ပဏီမှာ ရှယ်ယာဝင်ထားတဲ့ ကုမ္ပဏီဖြစ်ပါတယ်။ ဒီလေကြောင်း လိုင်းက SilkAir လေကြောင်းလိုင်းလည်း ဆောင်ရွက်လျက် ရှိပါတယ်။ Source. xinhua
မတော်မတရားပြုကျင့်ခံရခြင်းမှ လုံလောက်အောင် ကာကွယ်မပေးနိုင်ဟု နာမည်ထွက်နေတဲ့နိုင်ငံ ၄၁ နိုင်ငံ ကိုသွားရောက်ပြီး အလုပ်မလုပ်ဖို့ ဖိလစ်ပိုင်အလုပ်သမားများ ကို ပိတ်ပင်ထားကြောင်း ဖိလစ်ပိုင်အစိုးရက နိုဝင်ဘာ ၂ ရက်က ကြေညာပါတယ်။ အမည်ဆိုးစာရင်းသွင်းထား တဲ့ နိုင်ငံတွေက နိုင်ငံခြားလုပ်သားတွေကို ကာကွယ်မှု ပေးတဲ့ အပြည်ပြည်ဆိုင်ရာ ကွန်ဗင်းရှင်းသဘောတူစာချုပ် ကို လက်မှတ်ရေးထိုးခြင်းမရှိကြောင်း ဝန်ကြီးဌာနက တင် ထားတဲ့ ဝက်ဘ်ဆိုက်မှာ အလုပ်သမားနဲ့ အလုပ်အကိုင် နေရာချထားရေး ဝန်ကြီးဌာနက ဖော်ပြထားပါတယ်။ ဒီနိုင်ငံတွေက ပင်လယ်ရပ်ခြားဖိလစ်ပိုင်လုပ်သားတွေရဲ့ အခွင့်အရေးတွေကို ကာကွယ်မှုပေးဖို့ နှစ်နိုင်ငံသဘောတူ စာချုပ် ရေးထိုးထားခြင်း မရှိပါဘူးလို့ ဆိုပါတယ်။ ဒီနိုင်ငံတွေရဲ့ ဥပဒေတွေမှာလည်း နိုင်ငံခြား လုပ်သား တွေကို အကာအကွယ်ပေးတဲ့ ပြဌာန်းချက်တွေမရှိ ပါဘူးလို့ ကြေညာချက်မှာဖော်ပြထား ပါတယ်။ ဒီစာရင်း ထဲမှာ အာဖဂန်နစ္စတန်၊ လစ်ဗျား၊ အီရတ်၊ ဆူဒန်၊ ချတ်နဲ့ ပါကစ္စတန်နိုင်ငံတွေ ပါဝင်ပါတယ်။ ဖိလစ်ပိုင်နိုင်ငံမှာ ပင်လယ်ရပ်ခြားလုပ်သား ကိုးသန်း ရှိပြီး နိုင်ငံလူဦးရေရဲ့ ၁၀ ရာခိုင်နှုန်းရှိတယ်လို့ တရားဝင် ကိန်းဂဏန်းတွေမှာ ဖော်ပြထားပါတယ်။ အနောက်နိုင်ငံ တွေမှာ အဆင့်မြင့်တာဝန်ထမ်းဆောင်နေတဲ့ ဖိလစ်ပိုင် တွေရှိပေမဲ့ သူတို့ထဲက အများစုကအိမ်ဖော်တွေ၊ အလုပ် ကြမ်း သမားတွေနဲ့ သင်္ဘောသားတွေ ဖြစ်ပါတယ်။ Source. AFP
တောင်တရုတ်ပင်လယ်ပြင်မှာ ပင်လယ်ဓားပြတွေရဲ့ အပိုင်စီးတာကိုခံခဲ့ရတဲ့ မလေးရှားရေနံတင် သင်္ဘောနဲ့ ဝမ်းပြားသင်္ဘောကို မလေးရှားရေကြောင်း အာဏာပိုင် အဖွဲ့က ပြန်လည်ကယ်တင်ခဲ့တယ်လို့ အရာရှိ တွေက အောက်တိုဘာ ၃၀ရက်ကပြောပါတယ်။ မလေးရှားရင်းဂစ်တန်ဖိုး ၁၄ သန်း (ဒေါ်လာ ၄ ဒသမ ၆ သန်း) တန်ဖိုးရှိတဲ့ ရေနံနဲ့သဘာဝဓာတ်ငွေ့ကို တင်ဆောင်ထားတဲ့ ရေနံတင် သင်္ဘောကို စင်ကာပူရေလက်ကြားမှာ အောက်တိုဘာ ၂၇ ရက်ကအပိုင်စီးခံခဲ့ရတာ ဖြစ်ပါတယ်။ သင်္ဘောကိုအဆက်အသွယ်မရတော့ဘူးလို့ သင်္ဘော ကုမ္ပဏီက သတိပေးချက်ထုတ်ပြန်ပြီးတဲ့နောက် မလေးရှား မှတ်ပုံတင်သင်္ဘော MT Nautic Johor Bahru ကို စင်ကာပူနိုင်ငံအရှေ့ဘက်ကမ်းခြေမှာ အောက်တိုဘာ ၂၈ ရက်က အာဏာပိုင်တွေက ခြေရာခံမိကြပါတယ်။ မလေးရှားရေတပ်နဲ့ အင်ဒိုနီးရှားရေတပ်ဖွဲ့တို့က အင်ဒိုနီးရှား ပင်လယ်ပြင်မှာ သင်္ဘောကို ပင်လယ်ဓားပြ တွေ လက်က ပြန်လည်သိမ်းယူနိုင်ခဲ့ပါတယ်။ ပစ္စတိုတွေနဲ့ ဓားရှည် တွေကိုင်ဆောင်ထားတဲ့ ပင်လယ်ဓားပြတွေ လို ယူဆရတဲ့ လက်နက်ကိုင် ၁၀ ယောက်က စပိဘုတ်နဲ့ ထွက်ပြေးလွတ်မြောက်သွားပါတယ်။ သင်္ဘောက မလေးရှားကျွန်းဆွယ်ကနေ ဘိုနီယိုကျွန်း စုကို ဦးတည်သွားလာနေတာ ဖြစ်ပြီး သင်္ဘောဝန်ထမ်း ၁၉ ဦးထဲက တစ်ဦးတစ်ယောက်မှ ထိခိုက်ဒဏ်ရာရတာ မရှိပေမဲ့သူတို့ရဲ့ပစ္စည်းတွေကို အခိုးခံခဲ့ရပါတယ်။ တစ်ချိန် တည်းမှာ အာဏာပိုင်တွေက သင်္ဘောသားနှစ်ဦးနဲ့ ရင်းဂစ် ရှစ်သန်းဖိုး စားအုန်းဆီတွေ တင်ဆောင်ထားတဲ့ ဝမ်းပြား သင်္ဘောတစ်စီးကို မလေးရှားအာဏာပိုင်တွေက မလေးရှား နိုင်ငံတောင်ဘက်ကမ်းလွန်မှာ အောက်တိုဘာ ၂၇ ရက်ကကယ်တင်ခဲ့တယ်လို့ ပင်လယ်ရေကြောင်းဥပဒေ စိုးမိုးရေး အေဂျင်စီ ဒေသဆိုင်ရာတပ်မှူး ဇူကီဖလီအဘူ ဘာကာက ပြောပါတယ်။ ဝမ်းပြားသင်္ဘောကဘော်နီယိုကနေ မလေးရှား ကျွန်းဆွယ်ကို သွားနေစဉ် အောက်တိုဘာ ၂၆ ရက်က အင်ဒို နီးရှား ပင်လယ်ပြင်မှာ အပိုင်စီးခံခဲ့ရတာဖြစ်ပါတယ်။ Source. AFP
ဂျပန်နိုင်ငံရဲ့ စက်တင်ဘာစက်မှု ကုန်ထုတ်လုပ်မှုက သြဂုတ်လ ထက် ၄ ရာခိုင်နှုန်း ကျဆင်းခဲ့တယ်လို့ အောက်တိုဘာ ၂၈ ရက်က ထုတ်ပြန်တဲ့ အစိုးရစာရင်းဇယားများမှာ တွေ့ရပါတယ်။ကုန်ထုတ်လုပ်မှု ကျဆင်းရတဲ့ အဓိကအကြောင်းရင်းက လူစီးကားများ၊ တစ်ပိုင်း လျှပ်ကူးပစ္စည်းများနဲ့ဆယ်လူလာဖုန်း ထုတ်လုပ်မှုတွေ ကျဆင်းလို့ ဖြစ်တယ်လို့ အစိုးရကပြောပါတယ်။ ဒါပေမဲ့ အောက်တိုဘာနဲ့ နိုဝင် ဘာမှာ ထုတ်လုပ်မှုပြန်တက်မယ်လို့ ခန်းမှန်းထားပါတယ်။ Source.AFP
မလေးရှားနိုင်ငံမှာ နည်းပညာသစ်ကို ဝယ်လိုအားမြင့်မားလာတဲ့ အတွက် ၂၀၂၀ ပြည့်နှစ်မှာ ဒစ်ဂျစ်တယ် စီးပွားရေးလိုအကောင်အထည် ဖော်နိုင်မဲ့လမ်းကြောင်းပေါ်ကို ရောက်ရှိနေပြီလို့ ကမ္ဘာ့သတင်းအချက် အလက်နဲ့ လေ့လာဆန်းစစ်ရေးအေဂျင်စီ နီလ်ဆင်းက ပြောပါတယ်။ ၂၀၁၁ ခုနှစ် မလေးရှားဒစ်ဂျစ်တယ်စားသုံးသူ အစီရင်ခံစာ အရ မလေးရှား လူမျိုးတွေက အပြောင်းအလဲကိုဆောင်ရွက်ဖို့အသင့် ရှိနေပြီ ဖြစ်တဲ့အတွက် မလေးရှားမှာ နည်းပညာ သစ်ကို စိတ်ဝင်စားမှု တိုးတက် ခိုင်မာနေတယ်လို့ နီးလ်ဆင်းမလေးရှားရဲ့ ဒါရိုက်တာ လူကာဂရိဆယ်ရီလာ က ပြောပါတယ်။ မလေးရှားနိုင်ငံရဲ့ ဒစ်ဂျစ်တယ်အသွင်ကူးပြောင်းရေး အစီအစဉ်က စားသုံးသူတွေရဲ့ အပြုအမူကို ပြောင်းလဲ ပစ်တော့မယ်လို့ အောက်တိုဘာ ၂၄ ရက်ကကျင်းပတဲ့ ၂၀၁၁ ခုနှစ် မလေးရှားဒစ်ဂျစ်တယ် စားသုံးသူ အစီရင်ခံစာ ဖွင့်ပွဲအခမ်းအနားပြီးနောက် ကျင်းပတဲ့သတင်းစာရှင်းလင်း ပွဲမှာ သူကပြောပါတယ်။ မလေးရှားနိုင်ငံမှာ စမတ်ဖုန်းနဲ့ တဲဘလက် ကွန်ပျူတာတွေအသုံးပြုမှုက ထူးထူးခြားခြားအရှိန်အဟုန်ကောင်းလာ တာကို အစီရင်ခံစာအရသိရတယ်။ ဒါကြောင့် ဒီဂျစ်တယ်လုပ်ငန်းက ဒီကိရိယာတွေအလွယ်တကူရနိုင်အောင်ဆောင်ရွက်ပေးရမယ်လို့ သူက ပြောပါတယ်။ " စမတ်ဖုန်းပိုင်ဆိုင်မှုက ၁၂ လအတွင်းမှာ နှစ်ဆတိုးလာမယ်၊ ယခုလောလောဆယ်ပိုင်ဆိုင်မှု ၄၈ ရာခိုင်နှုန်းရှိရာကနေ ၈၉ ရာခိုင်နှုန်းရှိလာပြီး တဲဘလက်ကွန်ပျူတာပိုင်ဆိုင်မှုက လောလောဆယ် ၁၈ ရာခိုင်နှုန်းကနေ ၇၅ ရာခိုင်နှုန်းထိရှိလာမယ် "လို့သူကပြောပါတယ်။ ဒစ်ဂျစ်တယ်အသွင်ပြောင်းရေးအစီအစဉ်အောင်မြင်ဖို့အတွက် မလေးရှားလူမျိုးတွေက နည်းပညာသစ်နဲ့ ကိရိယာသစ်တွေကို အသုံးပြု လာနိုင်အောင် အခြေခံအဆောက်အအုံနဲ့ ကွန်ရက်စွမ်းအင်ကို မြှင့်တင်ပေးဖို့လိုပါမယ်။ ဒီလိုမြှင့်တင်နိုင်ဖို့အတွက် ဆက်သွယ်ရေးလုပ်ငန်း ရှင်တွေနဲ့ အစိုးရတို့ပူးပေါင်းဆောင်ရွက်မှုကောင်းမွန်အောင် လုပ်ရမယ်လို့ ဂရီဆယ်ရီက ပြောပါတယ်။ အခြေခံအဆောက်အအုံနဲ့ ပထဝီဝင်ဆိုင်ရာ ပြဿနာတွေကြောင့် အင်တာနက်နဲ့ နည်းပညာသစ်သုံးစွဲရာမှာ မလေးရှားနိုင်ငံက စင်ကာပူနဲ့ ထိုင်းနိုင်ငံတို့ရဲ့နောက်မှာ ကျန်နေတယ်လို့ သူကပြော ပါတယ်။ တဲဘလက်ကွန်ပျူတာနဲ့ စမတ်ဖုန်းတွေ အဝယ်လိုက် လာတဲ့ အပြင် အွန်လိုင်းအသုံးပြုချိန် တိုးတက်လာတဲ့အတွက် အွန်လိုင်း ကြော်ငြာ လုပ်ငန်းမှာ သုံးစွဲမှုပိုလာမယ်လို့ သူကပြောပါတယ်။ Source. bername.com
ဗီယက်နမ်မှာ ဒေါ်လာဈေးကွက်တွေမြောက်နေပြီး ဒေါ်လာဝယ်လိုအားလည်း တိုးတက်များပြားနေတဲ့ အတွက် ဒေါ်လာဈေးအပြင်ဈေးကွက်က ယခုရက်ပိုင်းမှာ လှုပ်လှုပ်ရှားရှားဖြစ်နေပါတယ်။နိုင်ငံတော်ဗဟိုဘဏ်က ရွှေဆိုင်တွေကို စစ်ဆေးတာကို အရှိန်မြှင့်ပြီး တရားမဝင် ဒေါ်လာရောင်းဝယ်တာကို နှိမ်နင်းဖို့ဆောင်ရွက်လာတဲ့ အတွက် လွတ်လပ်တဲ့ အပြင်ဒေါ်လာဈေးကွက် ပျောက်ကွယ်သွားလိမ့်မယ်လို့လွန်ခဲ့တဲ့ လအနည်းငယ်က လူတွေ ယုံကြည်ထားကြပါတယ်။ ဒါပေမဲ့ ဒေါ်လာဈေးကွက်က ပြန်ပြီးအရှိန်တက်လာပါတယ်။ အရောင်းအဝယ် လုပ်ကြ သူတွေကဗဟိုဘဏ်ရဲ့ စစ်ဆေးမှု ကလွတ်အောင်ရောင်းရာ ဝယ်ရာမှာ ပါးပါး နပ်နပ်ရှိရပါတယ်။ နှစ်ကုန်တဲ့အထိ ဒေါ်လာဝယ်လိုအားက မြင့်နေဦးမယ်၊ ဒါပေမဲ့ ဗဟိုဘဏ် ကမျက်လုံးဒေါက်ထောက်ကြည့်နေတဲ့အတွက် အရောင်း အဝယ်သမားတွေက သတိတော့ထားရတယ်လို့ ဟိုချီမင်းမှ ရွှေဆိုင်ပိုင်ရှင်တစ်ဦးက ပြောပါတယ်။ ရွှေဆိုင်ပိုင်ရှင်ဆီကို ဒေါ်လာဝယ်ဖို့လာတဲ့လူရှိတဲ့ အခါဆိုင်ရှင်ကရောင်းမဲ့လူကို ဖုန်းဆက်ခေါ်ပြီးတွေ့ပေး လိုက်ပါတယ်။ ဒေါ်လာရောင်းမဲ့သူကဒေါ်လာပေးတယ်။ ဒေါ်လာဝယ်မဲ့သူကဒေါင်ပေးတယ်။ မျက်နှာချင်းဆိုင်တွေ့ ပေးလိုက်တာပါပဲ။ စစ်ဆေးရေးသမားတွေလာရင်တော့ ဒီကိစ္စမှာကျွန်တော်မပါဘူးလို့ပြောရုံပါပဲလို့ ဆိုင်ရှင်က ပြောပါတယ်။ ရွှေဝယ်ရောင်းလုပ်တာထက် ဒေါ်လာရောင်းဝယ် လုပ်တာ ပိုကိုက်တယ်လို့ ရင်းနှီးမြှုပ်နှံသူတွေက ယုံကြည် ထားပါတယ်။ လူတစ်ယောက်ဟာ ရွှေအရောင်းအဝယ် လုပ်ရင်တစ်တီး(Tael) ကို အမြတ်ဒေါင် ၃၀၀ ၀၀၀ က ၅၀၀ ၀၀၀ ထိ ကျန်ပါတယ်။ ဒီငွေ ပမာဏနဲ့ ဒေါ်လာ အရောင်းအဝယ်လုပ်ရင် ဒေါင်တစ်သန်းအမြတ်ကျန်ပါတယ်။ ဒါကြောင့် အန္တရာယ်များပေမဲ့ ရွှေဆိုင်အတော် များများက ဒေါ်လာအရောင်းအဝယ်ကို ဆက်လုပ်နေပါတယ်။ ဒါပေမဲ့ သတိတော့အများကြီးထားရပါတယ်။ တချို့ ဆိုင်တွေက စစ်ဆေးရေးမှူးတွေရောက်လာရင် အချက် ပေးဖို့ အစောင့်တွေချထားပြီး ရောင်းဝယ်ကြပါတယ်။ ယခုအခါဆိုင်တွေက အရောင်းအဝယ်လုပ်တဲ့ ပုံစံကို ပြောင်းထားပါတယ်။ ဒေါ်လာဝယ်ဖို့ဖောက်သည်တွေ လာတဲ့အခါ ပထမတစ်ယောက်ကဒေါင် ကိုယူသွားပါတယ်။ နောက် ၅ မိနစ် ၁၀ မိနစ်လောက်ကြာမှ နောက်တစ်ယောက်လာပြီး ဒေါ်လာကိုပေးပါတယ်။ တချို့ဆိုင်တွေက သူတို့ကောင်းကောင်းသိပြီး ယုံ ကြည်ရတဲ့ ဖောက်သည်တွေကိုသာဆိုင်မှာ ရောင်းပါတယ်။ ဒေါ်လာ ၁၀၀၀၀ အောက်မှာသာအရောင်းအဝယ် လုပ်ပြီး များများလိုချင်ရင်နောက်တစ်ကြိမ်ပြန်ချိန်းပါတယ်။
ထိုင်းနိုင်ငံမှာ ဆယ်စုနှစ်ပေါင်းများစွာအတွင်း အဆိုးဆုံး ဖြစ်ခဲ့တဲ့ ရေလွှမ်းမိုးမှုဖြစ်ခဲ့ပါတယ်။ ဒါကြောင့် ပစ္စည်း ပေးသွင်းမှုတွေအပေါ်မှာ ဂယက်ရိုက်ခတ်မှုရှိခဲ့တဲ့အတွက် ထိုင်းနိုင်ငံမှာရှိတဲ့ စက်ရုံသုံးရုံကိုအနည်းဆုံး အောက်တို ဘာ ၁၅ ရက်အထိ ရပ်ထားရမယ်လို့ တိုယိုတာကုမ္ပဏီက အောက်တိုဘာ ၁၂ ရက်က ပြောပါတယ်။ ဆမ်ရောင်း၊ ဂိတ်ဝေးနဲ့ ဘန်ဖိုစက်ရုံတွေက ရေတိုက်ရိုက်လွှမ်းမိုးမှု မဖြစ် ခဲ့ပေမဲ့ ပစ္စည်းပေးသွင်းရသူတွေထံမှ နှောင့်နှေးမှုတွေရှိခဲ့တယ်လို့ တိုယိုတာက ပြောပါတယ်။ စက်ရုံသုံးရုံကစက်လည်ပတ်လုပ်ငန်းတွေကို အောက် တိုဘာ ၁၀ ရက်က စတင်ရပ်တန့်ခဲ့ရပြီး အောက်တိုဘာ ၁၅ ရက်မနက်အထိ ရပ်တန့်ထားရမှာဖြစ်ပါတယ်။ အဲဒီ ကျမှ နောက်ထပ်ဘာဆက်လုပ်ရမယ်ဆိုတာကို ကုမ္ပဏီ ကဆုံးဖြတ်မယ်လို့ပြောပါတယ်။ ဒီစက်ရုံသုံးခုက ထုတ်လုပ် ပေးတာက တစ်နှစ်ကိုစီးရေ ၆၅၀၀၀၀ ရှိပါတယ်။ ၂၀၁၀ ပြည့်နှစ်က စီးရေ ၆၃၀၀၀၀ ထုတ်လုပ်နိုင်ခဲ့ပါတယ်။ "နောက်ဆုံးပိတ်ထုတ်လုပ်မှုရပ်ဆိုင်းချိန်မှာ ကားစီး ရေ ဘယ်လောက်ကျဆင်းမယ်ဆိုတာကို မပြောနိုင်သေး ပါဘူး" လို့ ကုမ္ပဏီကဆိုပါတယ်။ အောက်တိုဘာ ၁၁ ရက် က တိုကျိုမှာတိုယိုတာရှယ်ယာတွေ သုည ဒသမ ၃၄ ရာခိုင်နှုန်းကျဆင်းခဲ့ပါတယ်။ ထူးထူးကဲကဲ ရွာသွန်းတဲ့ မုတ်သုံမိုးကြောင့် ဒုက္ခရောက်နေသူတွေကို အာဏာပိုင် တွေကကယ်တင်နေချိန်မှာ ထိုင်း၊ ကမ္ဘောဒီးယားနဲ့ ဗီယက် နမ်မှာ လူရာပေါင်းများစွာ သေဆုံးခဲ့ရပါတယ်။ Source.AFP
အောက်တိုဘာ ၁ ရက်က စပြီး ဗီယက်နမ်မှာ အနိမ့်ဆုံးနေ့တွက် လုပ်ခ လစာမူဝါဒသစ်ကို စတင်ကျင့် သုံးပါတယ်။ဒီမူဝါဒအရ အလုပ်သမားတစ်ဦးရဲ့ အနိမ့်ဆုံးလုပ်ခလစာက တစ်လကို ဗီယက်နမ်ဒေါင် ၁ သန်းရှိပါတယ်။ အလုပ်သမားတွေအတွက် လူမှုအာမခံပရီမီယံကို စီးပွား ရေး လုပ်ငန်းတွေက ပိုမိုတိုးမြှင့်ပေးရမှာဖြစ်တဲ့အတွက် ဒီမူဝါဒသစ်က သူတို့အပေါ် ဝန်ထုပ်ဝန်ပိုး ဖြစ်စေတယ်လို့ စီးပွားရေးလုပ်ငန်းတွေ ပြောကြပါတယ်။ အလုပ်သမား ၄၀၀ ရှိနေတဲ့ ကုမ္ပဏီတစ်ခုက လူမှုအာမခံ အဖြစ် တစ်လကို ဗီယက်နမ်ဒေါင် သန်း ၁၀၀ ထပ်ကုန်မယ်။ငွေကြေးဖေါင်းပွမှု ဖြစ်နေတဲ့အတွက် ဝယ်ယူနိုင်စွမ်းအားကျနေတဲ့ လက်ရှိအခြေအနေမျိုးမှာ ရောင်းအားကလည်းကျ၊ဝင်ငွေလည်းကျနေတဲ့အတွက် နောက်ထပ်ကုန် ကျရမဲ့ ကိစ္စမှန်သမျှက စီးပွားရေးလုပ်ငန်း တွေအတွက် ခေါင်းခဲစရာတွေ ဖြစ်နေတယ်လို့ ငုယင်ထရိုင်ကီယံ ကပြောပါတယ်။ကီယံက လက်ဆွဲအိတ် တွေ ထုတ်လုပ်တဲ့ Miti ကုမ္ပဏီရဲ့ဒါရိုက်တာတစ်ဦး ဖြစ်ပါတယ်။ တကယ်တော့ အနိမ့်ဆုံးလစာသတ်မှတ်ချက်က အမည်ခံမျှသာ ဖြစ် တဲ့အတွက် အနိမ့်ဆုံးလစာ သတ်မှတ်ချက်ကြောင့် အလုပ်သမားတွေ အတွက်ထူးပြီး အကျိုးသက်ရောက်မှုရှိမှာမဟုတ်ဘူး။ အလုပ်သမားတွေ တကယ်ရနေတဲ့ အနိမ့်ဆုံးလစာက ဥပမာ Miti မှာတစ်လကိုဒေါင် ၂ ဒသမ ၅ သန်းဖြစ်ပါတယ်။ ဗီယက်နမ်လုပ်ငန်းတွေမှာ လစာစာရင်းနှစ်မျိုးထားပါတယ်။ပထမ တစ်မျိုးက နိုင်ငံတော်က သတ်မှတ် ထားတဲ့ နှုန်းထားနဲ့ တွက်ချက်တဲ့ လစာ စာရင်းဖြစ်ပါတယ်။ ဒီစာရင်းက လူမှုအာမခံပရီမီယံ တွက်ဖို့ထားတဲ့ စာရင်းဖြစ်ပြီး အမှန်ပေးရတဲ့ လစာထက်နည်းပြီး တွက်ထားပါတယ်။ ဒုတိယစာရင်း အလုပ်ရှင် အလုပ်သမားညှိနှိုင်းထားတဲ့ လစာအရ ရေးဆွဲ ထားတဲ့ စာရင်းဖြစ်ပါတယ်။ Source.vietnamnetbridge.com
အိန္ဒိယနိုင်ငံကအများပြည်သူသုံးနိုင်သော ကွန်ပျူတာကို အောက်တိုဘာ ၅ ရက်ကစတင်ပြီး ဖြန့်ချိခဲ့ပါတယ်။ အဲဒီ တဲဘလက်ကွန်ပျူတာဈေးနှုန်းက ၄၆ ဒေါ်လာ ဖြစ်ပြီး ကျောင်းသားသန်းပေါင်းများစွာအတွက် သတင်းအချက်အလက်များ ရယူနိုင်ဖို့ အတွက် အသုံးပြုနိုင်အောင်ရေးဆွဲထုတ်လုပ်ထားတာ ဖြစ်ပါတယ်။ တက္ကသိုလ်နဲ့ ကောလိပ်ကျောင်းသားတွေကို အခမဲ့ဖြန့်ချိနိုင်ဖို့အတွက် ကွန်ပျူတာ တစ်လုံးကို ၂၂၇၆ ရူပီး (၄၆ ဒေါ်လာ )နဲ့ လုံးရေတစ်သိန်းကို အစိုးရက ဝယ်ယူခဲ့တယ်လို့ ကနေဒါ အခြေစိုက်ထုတ်လုပ်သူ ဒေတာဝင်း DataWind က ပြောပါတယ်။ ကမ္ဘာ့ဈေးအချိုဆုံးကွန်ပျူတာလို့ အမည်တပ်နိုင်ဖို့အတွက် ဈေးနှုန်းကတစ်လုံးကို ၃၅ ဒေါ်လာ၊ တတ်နိုင်ရင် ၁၀ ဒေါ်လာအထိ ချနိုင်အောင်လုပ်ရပါမယ်လို့ နယူးဒေလီ မှာ ကျင်းပတဲ့ဖွင့်ပွဲမှာ ဒေတာဝင်းကပြောပါတယ်။ ကွန်ပျူတာမှာ ခုနှစ်လက်မ (၁၈ စင်တီမီတာ)ရှိတဲ့ Touchscreen ဝိုင်ဖိုင်အင်တာနက်ဖန်ရှင်၊ မာလတီမီဒီယာပလေယာ နဲ့ မိနစ် ၁၈၀ ခံတဲ့ဘက်ထရီ ပါဝင်ပါတယ်။ ကွန်ပျူတာတံဆိပ်အမည်ကို Aakash လို့အမည်ပေးထားပြီး ''ကောင်းကင်''လို့ အဓိပ္ပါယ်ရပါတယ်။ အိန္ဒိယပြည်တွင်းမှာ ထုတ်လုပ်တာဖြစ်ပြီး အန်ဒရွိုက် ၂ ဒသမ ၂ စက်လည်ပတ်မှုစနစ်ကိုသုံးပါတယ်။ External 2 GB Stroage Card နဲ့ USB နှစ်ခုပါပါတယ်။ ပထမဆုံးအနေနဲ့ ကွန်ပျူတာတွေကို အပြင်ဆိုင်တွေမှာ မရောင်းသေးဘဲ တက္ကသိုလ်နဲ့ ကောလိပ်တွေကနေ တစ်ဆင့် ဖြန့်ချိမှာဖြစ်ပါတယ်။ ရေရှည်ဈေးကွက် မဟာဗျူဟာကို ချထားနိုင်ခြင်းမရှိသေးပါဘူး။ မိုဘိုင်းဖုန်းတွေကို လူတွေသန်းချီပြီး ဝယ်ကြသလို အိန္ဒိယစားသုံးသူတွေက တဲဘလက်ကွန်ပျူတာတွေကို အများအပြား ဝယ်ယူ လာကြလိမ့်မယ်လို့ စီးပွားဖြစ် ထုတ်လုပ်သူတွေက ခန့်မှန်းကြပါတယ်။ အပြည်ပြည်ဆိုင်ရာ နာမည်ကြီးနေတဲ့ အိုင်ပက်ကွန်ပျူတာက အိန္ဒိယမှာ ဒေါ်လာ ၆၀၀ ဈေးပေါက်ပြီး ပြိုင်ဖက် Reliance Communication ကထုတ်တဲ့ တဲဘလက် ကွန်ပျူတာက ဒေါ်လာ ၂၉၀ ရှိပါတယ်။ Source.AFP.
စင်ကာပူရှိ နိုင်ငံခြားသားဇနီးသည်တို့ အခက်အခဲတွေ့ စင်ကာပူ နိုင်ငံမှာ နေထိုင်ကြတဲ့ နိုင်ငံခြားသား ဇနီးသည်တွေမှာ မရေရာမှုနဲ့ စိုးရိမ်းပူပန်မှုတွေနဲ့ တွေ့ကြုံပြီး ဘဝအခက်အခဲတွေ ရှိနေပါတယ်။ စင်ကာပူမှာ မွေးတဲ့သူတို့ကလေးတွေ ကျောင်းထားဖို့၊ စားပွဲပေါ် စားစရာ ရောက်လာဖို့၊ နေထိုင်ဖို့ စတဲ့ အကြောင်းအရာတွေက သူတို့အဖို့ နေ့တဓူဝ ရင်ဆိုင်နေရတဲ့ပြဿနာတွေဖြစ်ပါတယ်။ MediaCorp က မေးမြန်းခဲ့တဲ့၊ မိသားစု ဝန်ဆောင်မှု စင်တာ (FSCs) များ အဆိုအရ အကူအညီလာတောင်းတဲ့ နိုင်ငံခြားသားဇနီးသည်ဦးရေ တစစ တိုးလာတယ်လို့ သိရပါတယ်။ FSCs များ၏ အဆိုအရ အကူအညီလာတောင်းကြတဲ့ ဇနီးသည်တွေရဲ့ ခင်ပွန်းအချို့မှာ သေဆုံးသူ သို့မဟုတ် ထောင်ဒဏ်ကျခံနေရသူတွေ ဖြစ်ပါတယ်။ တချို့က ခင်ပွန်းသည်ရဲ့ စွန့်ပစ်ခြင်းခံရသူတွေ ဖြစ်ပါတယ်။ ဒီအမျိုးသမီးတွေက ဝပ်ပါမစ်ရရှိထားသူတွေ ဖြစ်ပေမဲ့ အလုပ်အတွက်လိုအပ်တဲ့ ကျွမ်းကျင်မှုနဲ့ ပညာအရည်အချင်း မပြည့်စုံသူတွေ ဖြစ်ပါတယ်။ တရားဝင်စာရင်းဇယားတွေ မရှိပေမဲ့ ဒီအရေအတွက်ကတိုးတက်နေတာက စိုးရိမ်စရာ ဖြစ်နေပါတယ်။ စေတနာ့ ဝန်ထမ်းသက်သာချောင်ချိရေး အဖွဲ့အစည်းတစ်ခုဖြစ်တဲ့ Yong-En Care Centre မှာ ဒီလိုကိစ္စမျိုး ၂ဝ၁ဝ ပြည့်က မရှိခဲ့ပေမဲ့ ယခုနှစ်မှာ ၁၁ ခု ရှိခဲ့ပါတယ်။ ဒီမိသားစုတွေက ဆင်းရဲတဲ့အတွက် ကလေးတွေရဲ့ ပညာရေးက ကြီးမားတဲ့ စိန်ခေါ်မှု ဖြစ်နေပါတယ်။ဘာသာစကားကလည်း ပြဿနာတစ်ခု ဖြစ်ပါတယ်။ သူတို့ကို အင်္ဂလိပ်လိုပြောတဲ့အခါ ပြောတာကို သူတို့ နားမလည်ဘူးလို့ Yong-En Care Centre ရဲ့ အမှုဆောင်အရာရှိက ပြောပါတယ်။ Source: CNA